متسارعه ، فعاله ، كذا أقدر أوصف الولاده كيف كانت

ياهلا و الله

بالبدايه مثل ماذكرت لكم قبل كانت عندي مشكلة زيادة السائل الأمونسي حول الجنين ، ماكانت مشكله عويصه ، لكنها خلتني اتراجع عن فكرة الولاده بالمنزل اللي كنت مخططه لها 😅 ( بصراحه ماكان فيه ترتيب ، قلت بقعد أطول وقت ممكن و اذا طلع الجنين اكلم الطوارئ ،، كانت خطه مجنونه بس لازم يكون كل شي تمام ١٠٠٪ ، و في حالتي ماكان كل شي تمام ألا ٩٠٪ )

اخترت مستشفى الحبيب لأولد فيه بالخير ، كان هو الأكثر دعماً للولاده الغريزيه حسب بحثي

يوم رحت اخر مراجعه مع د.رانيا ، تقول كل شي تمام ، لا يوجد تخوف من زيادة السائل ألا في حالة نزول الحبل السري قبل الجنين و هنا بتكون المشكله و وقتها ممكن أتحول عمليه ، لكنها حاله نادره جدا ،، تعرفون مثَل ( اللي يخاف من البعبع يجي له ؟ ) قررت اني اتصالح مع فكرة العمليه ، و فكره أنه ممكن مايكون كل شي على مايرام ، عادي ، المهم ربي معي ، و اللي يجي منه نعمه ، اتخيل لو تمسكت بالخوف و رفض العمليه ممكن يكون اختباري فيها ، فـ تعلموا بنات ماتزعلون من الاختبارات اللي يحطها ربي لكم ، احنا نعمل اللي علينا و اللي يجي من ربي حياه الله

المهم الدكتوره كتبت لي طلق صناعي يوم الأحد ( وقتها بكون كملت الاسبوع ٤٠ ) ماكانت تبيني أتأخر أكثر عشان مايزيد الماء أكثر بشكل خطير

طبعا نوره 🙂 ماكان لها نيه تروح له طبعاً 😂 عندي فرصه لين الأسبوع ٤٢ عادي ، فـ أحب الأمور تمشي بشكل طبيعي و أتابع الجنين و الماء كل يوم و خلاص

استمريت عالرياضه عالكره عشان ينزل البيبي للحوض لأنه ماكان engage صح عالحوض بسبب زيادة المياه ، كذلك كان breach 😬 لنفس السبب ، كان يسبح و يتشقلب كل شوي ماضاق الرحم عليه مره بمكان واحد 😅

مع كل هذا محدثتكم لازالت متمسكه بالايجابيه و لا سمحت لذرة خوف أو قلق تدخل فيني ، مريحه راسي أنه ربي اللي خلق هذا الجسد يعرف كيف يتصرف ، مايحتاج أشيل هم ، اللي علي أعمله و الباقي على رب العالمين ، أعرف أنه فيه فرصه أنه كل شي بيكون مثالي لين وقت الدفع عادي ، خصوصاً أنه هذا رابع حمل ، فـ وارد أنه هالشي يصير عادي ، الجسم تعود عالانجاب تبارك الله فـ يعرف كيف يتصرف ، نقول يمون 😆

كثفت عالعيار تبع استراتيجيات اخر الحمل ، من بانيو دافي باملاح مغنيسيوم ، و مشي عالبحر و شاي ورق التوت و كل يومين اسوي اي شي بالصالون يا بديكير و لا مساج ، اقل شي مساج أقدام أو مناكير بس ، اي شي يشتتني عن الانتظار و يحسسني بالدلع عشان نرفع الاوكسيتوسن المطلوب لبدء الولاده

رحت لطبيبتي في مجمع مرجان ( مااعرف اذا للحين موجوده ) يوم السبت ، اللي هو قبل يوم الطلق الصناعي بيوم

كشفت علي الكشف الروتيني الساعه ٣ العصر ، لقت انه الرحم فاتح ٣ سم ، قالت انتي بتولدي خلاص 😁

قلت لها تعمل لي توسيع لتحريض الولاده و تسريعها ( يعتبر إجراء آمن اذا الولاده بدت و الرحم توسع )

و طلعت منها وقعدت امشي بالممرات حقت العياده ساعه بعدين رجعت لها مثل ماطلبت مني ، و لقت الرحم توسع لـ ٤ ، كذا معناته التحريض نفع و دخلنا بالمرحلة الأولى بالولاده

كنت حاجزه مساج حوامل تجيني للبيت ، ماكنسلتها طبعا 🙄 خليتها تجي و سويت جلسه لطيفه لتدعم تدفق هرمون الاوكسيتوسن و نسرع عمليه الولاده و أخلق تجربه ايجابيه أكثر . و خليتها تشغل لي روايح لافندر و sage , السيج او المراميه يحفز الطلق كذلك ، خلصت الجلسه و تغديت ، سويت لي ترمس شاي ورق التوت و صحن أناناس فريش ، و قعدت عالكره اشربه و أشوف أفلام ( كل هذا و انا في الطلق ، الانقباضات كانت خفيييفه يدوب احس فيها ، احينا احتاج اركز عشان احس فيها و اعد بين كل طلقة و طلقه كم )

طلقه اقعد فيها عالكره اتنفس ، و طلقه بالحمام تكرمون ، نفرغ المثانه لنوسع للبيبي يدخل عالحوض أسهل

يوم صارت الأحاسيس كل ٣ دقايق رحت للمستشفى ، و كلمت اختي تقعد مع بناتي عشان اكون متطمنه تمام خصوصا انه العامله كانت جديده عندي

الاحاسيس لازالت خفيفه جدا يدوب احس فيها ، وصلت عالمستشفى و قالوا لي ٥ سم بس ، فكرت ارجع للبيت ، لكن بناتي كانو منهبلين 😅 صراخ و لعب و كل شوي داخلين علي ماااااماااااا ، فـ قررت اقعد بالمستشفى و أسوي لي أجوائي الهاديه بالغرفه احسن . كلمت الدولا تجيني لهناك و طلعت لغرفة الولاده مباشره

أنا معطيتهم خطة الولاده حقتي من قبل ، و يوم وصلت كان معي نسخه بعد عطيتهم ياها ، احد اهم النقاط اللي فيها أنه ماتدخلون علي كل شوي ، فـ طلبت منهم هذا الشي بأدب و قلت لهم خلاص طفوا اللمبات بنام و لاتدخلون علي ، و فعلاً احترموا هذا الشي ، ابدا مايجون ألا إذا طلبتهم

على الساعه ٩ بالليل بدت الأحاسيس ( الطلوق ) تشتد و تقوى حدتها و صرت اقدر أحس فيها ، امم ماكانت مؤلمه ، إنما شعور ضغط ، بس أحب اركز فيه خلاله بالتنفس ، بس عادي رايقه و حاطه سماعات اسمع شوي قرآن و شوي أدق رقبه على أغاني ورده الجزائريه مدري ليش مسكت معي 😂 ، و أنا كل إحساس اخذه و أنا سكوات أو بالحمام ، و معي الدولا تعلمني تمارين و تمشي معي و تعطيني أكل و تسوي لي مساجات معينه و توجهني للحركه الصحيحه ، وجودها كان ٨٠٪ مساعد لتجربه ايجابيه حكيمه اقدر أقول ، و زوجي معي كذلك كدعم نفسي ، وجوده كان مهم و يرفع معنوياتي أكثر

الأحاسيس بدت تشتد و الطفل لازال فوق حسب فحص الدكتوره ، كانت مقترحه علي من البدايه تفتح كيس الجنين ، بس قلت لها خلي كل شي يمشي طبيعي مو الحين ، لكن ناديتها الساعه ١٢ عشان تفتحه خلاص ممكن الأمور تسرع أكثر ، يوم قاستني قالت لسا ٥ و نص تخيلوا 🙂💔 و أنا احسبها بتقول لي فاتح ٨ – ٩ خلاص 😂💔 ، قالت اذا فتح ٧ رح افتح لك ، الحين لسا العنق فوق ،، مو أنتي تبين كل شي طبيعي و بدون تدخلات و مسكنات ؟ خلاص اصبري نخلي الأمور تمشي ببطء بشكل طبيعي ، و مارح تولدين ألا ٨ الصباح ( قالتها مثل الدقّه علي حسيتها حاقده على لأن كل خطة ولادتي NO NO NO 😆 نعم أنا البيشنت البثره النشبه بالنسبه للدكاتره )

هنا تحطمت حقيقي ، حتى كلمت نوران و أنا زعلانه أنه التقلصات اشتدت و مرت ثلاث ساعات بالأخير ماصار تطور 😭

قالت لي نامي و أعتبري أنه مش ولاده ، و كل شي بيصير تمام

طبعاً نتيجة هذا التوتر هذا ارتفاع ادرينالين خلا الأحاسيس أقل راحه 😅💔

تمالكت الموضوع و شغلت جلسات التنويم الإيحائي اللي اخذتها من دورة نوران و قعدت ادعي ربي بمعجزه تخلي كل شي يمر بسرعه عكس توقعاتهم 🙄 صرت أنام بين الإحساس و الثاني ، و مع كل إحساس أتمتم بـ٣٢١ استرخي ،، مفعولها سحري بنات ،، جسمي لا شعوري يدخل في عمق الاسترخاء و الإحساس يصير كثيير محتمل

 

في مرحلة ما ، أحس أني طلعت برا الكره الأرضيه و دخلت داخل نفسي ، شعور روحاني عظيم ، قعدت أتأمل روعة خلق جسد الإنسان ، كيف ربي خلق الرحم ليشتغل كعضو منفصل عني ، اللي علي أعطيه فرصته ليشتغل بس بأني أخلي كل الطاقه له لحاله ، بإني أرخي باقي عضلات جسمي

بعد ساعه ، الساعه ٢ ماكملت النوم ، قلت خل أقوم أتحرك شوي و ساعدتني الدولا ربطت لي حبل عالسرير و قعدت أعمل سكوات

فورا بديت أحس بالدفع ، مادفعت ، كنت أعمل الـ G breathing ، و الدولا تذكرني في لما تشوفني بديت ادفع أو اتعصر لا شعوري ، طبعاً هذا نتيجه تدريب مطول خلال كل اشهر الحمل وقت الحمام ، فـ كان تطبيقه سهل بالنسبه لي

الحمدلله بديت أحس بالماء يتسرب ، وقتها ارتفعت معنوياتي للسماااااااااء أنه خلاص بولد ، حتى هالشي أنعكس عالأحاسيس ، يابنات ماصار فيه ألم يوم انبسطت 😂 صار إحساس شد لا يمت للألم بصله 👏

و بعد ثاني إحساس فجأه : بوووووووم انكب كل السائل الأمونسي من الرحم ، ملا أرض الغرفه كلها ماتوقعته هالكثر 😅

طقينا الجرس و جو الطاقم بسرعه ، و انا بعالم ثااااااني ، بمرحلة الدفع و كأنه الروح تطلع لمكان ثاني ، كأني داخل كوكب ماأحس باللي حولي ، و هنا تكمن روحانيه خروج الروح من الروح 💕 بصعوبه فهمت منهم أنه أطلعي عالسرير قمت شوي شوي عالسرير طلقه اخذتها و أنا سكوات بعدين تحركت قمت و ركيت كتوفي و يديني عالسرير و ركعت و اخذت الطلقه بهالوضعيه مع لتنفس للأسفل و أنا أحسه قاعد يطلع شوي شوي و انسدحت على جنب و رفعت رجلي و بهنا كانت الدفعه الثالثه ، مدري جسمي كان يطلب مني هالوضعيه ، مع أني كنت مخططه على الجلوس على اربع ، لكن وقتها جسمك رح يطلب منك الوضعيه اللي تناسبه

ساعدتني الدكتوره بمساج لتوسيع المهبل بدون مايتمزق و عشان ماتقص ، الدفعه الأخيره حسيت بقوه عظيمه قاعده تتدفق لجسدي ، و دفعت بأقوى ماعندي بطريقة hors breathing  اللي ذكرتني فيها الدولا و كانت فعاله جدا

 

 

و طلع جنيني للدنيا أخيراً 💕

شعور الولاده ، فعلاً خروج الروح من الروح ، إحساس أنه روحي أنا أنولدت من جديد مو بس هو ولد ، و كأنه نوره الإولى طلعت و دخلت نوره ثانيه فور خروج طفلي من جسمي ، عيوني صارت تشوف بمنظور اخر ، و كأني كنت لابسه نظاره سوداء و فجأه شلت هالنظاره و أصبحت أرى النور من جديد 💕 كيف ربي يبدل التعب كله بفرحه و عرس 💕 الحمدلله لك يارب ، أن شاء الله كل وحده فيكم تعيش هذا الشعور بأجمل شكل 💕

 

خلوني أشوف فهد شوي بس بعدين اخذوه فوراً يشفطون الماء اللي برئته عشانه كان متبرز داخل ، مع أنه الولاده ماطولت أبدا ، المرحلة الثالثه الشديده كانت ساعتين بس ، لكنها قويه سريعه ، عطوه اكسجين و قعدوا يحوسون فيه على مااخلص أنا باقي إجرادات الولاده من خروج مشيمه و خياطه و غيره ( صار عندي تمزق بسيط جدا احتاج غرزتين بس ) جابوه لي و رضعته و عملنا سكين تو سكين و عشنا الساعه الذهبيه مع زوجي و فهدو الحمدلله علي نعمه و فضله حمداً كبيراً

الله يرزق كل من يبي يارب أجمل لحظات الحمل و الولاده ياكريم

 

تجربتي مع مستشفى الحبيب

كانت ممتازه جداً ، دعموا خطتي بكامل تفاصيلها ، عندهم العمود اللي بالسرير حق السكوات ، اطلبي منهم يحطونه لك ، ترا مايحبون يركبونه مدري ليش 😂 و عندهم كرة ولاده ، و اهم شي جهاز التخطيط المتنقل تقدرين تطلبينه منهم عشان يصير عندك حريه بالحركه ، فـ كنت طول الوقت اتحرك و امشي وهو علي

الأكل لذيذ تبع دايت سنتر ، العنايه ممتازه ، طفلك يصير قدامك عالشاشه تشوفينه وهو بالحضانه ، و عادي يقعد عندك طول الوقت بعد اذا طلبتي ، كنت اذا بروح حمام أخليهم ياخذونه عندهم عشان مايصير لحاله ، و اذا خلصت يجيبونه يقعد عندي ، طبعاً طالبه منهم أنه يرضع طبيعي فـ مااعطوه صناعي لما يكون عندهم بالحضانه ، التنويم ليله بس ، و من بكرا قبل الظهر تمشين فـ اذا ناويه تسوين استقبال بالمستشفى مايمنديك ألا اذا بتحجزين ليله زياده

ماأخذت أي نوع مسكن ، اعتمدت عالتنفس و الإسترخاء اللي تعلمته بالكورسات ” وصدقوني ” كان كثييير فعال أكثر من مسكنات المستشفى اللي جربتها بكل أنواعها بولاداتي اللي قبل

الخدمات فندقيه مثل أي مستشفى خاص اخر مايحتاج تجيبين معك أشياء للعنايه ، من شامبو و فرشاة اسنان و فوطه و غيره ، الشبشب حقهم جلد بارد فـ جيبي معك شراب احسن

الدولا اخذت رقمها من موقع أماني بيرث

هنديه كانت ، تتكلم انجليزي و شوية كلمات عربي ، رائعه تهبل و هي بنفسها عندها ٤ اطفال فـ مرت بهالتجريه ، هذه صفحتها

و بموقع اماني تلقون دولات من كل العالم ، انتوا تواصلوا معهم و شوفوا عروضهم و اللي يقدمونه و اختاروا اللي يناسبكم

 

خطة ولادتي

ارقفت كذا نموذج لخطط الولاده في متجري ، حطيت الخيارات الآساسيه المفضله لأغلب البنات ، و مفتوحه لك بشكل مرن بحيث تقدرين تعدلين و تضيفين عليها اللي تحبين، خليتها بالانجليزي ليكون المناسب لكل المستشفيات حتى لو الطاقم عرب رح يفهمون طبعاً و انتي تقدرين تترجمينه بجوجل اذا حابه

 

كذلك يسعدني أكون شريكتك في رحلة حملك و ولادتك لتحصلي على أجمل تجربه ممكنه , فتحت باقات اشتراك التدريب الصحي للحمل و الولاده اذا حابه مساعده لتطوير تجربتك لأفضل شكل من هنا كل التفاصيل 💖

و هذا كان كل شي ، تدوينه دسمه صحيح ماحبيت أتخطى أي تفصيل ، أنوي لكم أجمل ولاده ، و آجمل رزق و حمل لأي وحده ودها 💕