الشهر السابع /

هه بدينا المرحلة الأخيره من الحمل مبروك 😍 الوقت قرب للقاء جنينك و باقي شهرين بس لتشوفينه

الحين الجنين قاعد ياخذ مني دم أكثر ، يحتاج بروتين و دهون أكثر لبناء الباقي من جسمه ، غالباً التكوين الأساسي لعظامه و خلاياه العصبيه خلص ، باقي بعض الرتوش و البناء العضلي و الدهني له ( وصفي بس بيخلي الدكاتره يدعون علي 😂 )

ليثين دوار الشمس ممتاز لبناء دهون صحيه للطفل كذلك زيت كبد الحوت أو الأوميجا ثري ، كذلك ممتازين خلال الرضاعه تخلي حليبك ثقيل و يشبع ، و فيه دراسات تتكلم عن انه ليثين دوار الشمس كويس لتليين عضلات قاع الرحم بالتالي تتوسع اسهل و بطريقه أسلس لخروج الجنين

الإهتمام بالأكل صار أكبر الحين ، الجنين ياخذ اكثر صار و رح ياخذ اكثر الأيام الجايه فضروري نحرص عالأكل الصحي و الفيتامينات

حبيت أكثف مصادر معلوماتي عن الحمل و الولاده و خصوصاً موضوع الهيبنوبيرث أو الولاده الفطريه ، أبي ادخل مرحلة الولاده و أنا بكامل علمي و معرفتي باللي يصير ، مابي ارمي نفسي عالأطباء بكل جهل مثل قبل ، مااعرف ايش قاعد يصير لجسمي . أبي أعرف كل خليه بجسمي كيف قاعده تشتغل وقت الولاده عشان اعرف استشعر هالشي و أتقبله بحب ، العلم هو سلاحك الوحيد للولاده الجميله ، الخوف مصدره الجهل ، نلغي الجهل يروح الخوف تلقائياً

فـ دخلت كورس الحبيبه مريم بوحميد أيضاً ، واثقه جداً بعلمها و جمال تجربتها بالحمل و الولاده و شغفها الواضح بهالموضوع

هنا رابط الكورس

الكورس حقها كان مثل الطبطبه علي قلبك 💕 التفاصيل العلميه اللي ذكرتها بحب و النصائح مثل صديقتك المحبه اللي تبي مصلحتك ، بتخليك تدخلين عالولاده بثقه و حب ، كان مكمل لكورس نوران اللي قبل ، كل وحده عندها علم و تحاول توصله بطريقتها المبدعه بكل حب ( كم مره قلب حب بهالقسم ؟ )

أشوفهم كورسات مكملين لبعض و أفضل استثمار لجسمك و لطفلك و لتجربة ولادتك ، ظلم لنفسك إذا دخلتي عالولاده بجهل و صدقيني مريت بهالشي و أشكر ربي كل يوم على دخولي بهالكورسات

بديت اكثف شربي لشاي ورق التوت rasberry leaf tea ** ليساعد على ولاده سلسه اكثر و تليين عنق الرحم و تسريع عملية الولاده بشكل عام ، الأبحاث عليه قويه جداً و مشجعه ، و مالقيت له بديل ، وجوده مهم لكل حامل

و استبدلت كرسي المكتب بكرة الولاده هذه

كثير اريح للحوض و يساعد على تمرينه و تقويته استعداداً للولاده

قاعدين نعتني بنفسيتنا بعد 😊 بانيو معبى أملاح ابسوم أو باث بومب بالريحه اللي احبها أجمل مكافأه لي قبل النوم ، هبيت بهذا المنتجين من اي هيرب يخلصون و اشتري زياده ،، روايحهم متوحمه فيها حالياً 😩💕

و بعدها اشغل شمعة همالايا و الديفيوزر على ريحة اللافندر و الاكلوبتاس ( آمنين للحامل )

و كوب رازبيري تي مع كتاب أو مسلسل كوميدي ، أنام و أنا أسمع جلسات التنويم الإيحائي حقت الهيبنوبيرث اللي اخذناها بكورس نوران و أحلى شي أختم فيه يومي 💕

فيه منغصات أكيد وقت الحمل بس أحب أركز على الإيجابي بحياتي و هو اللي أوثقه ، كل هالأشياء أسويها عشان أرمم ضغوطات اليوم اللي تصير خلال اليوم مع الأطفال و المسؤوليات و الشغل و غيره

لا تنسين حق نفسك مهما كانت الظروف 💕

الشهر الثامن /

ياثقله ثقلاااااه 😩 الضغط اكبر على الجسم و المعده و الرئه ، زيارات الحمام كثرت ، و اعرف رح تكثر الشهر القادم ، و هذه رحمه من ربي للتمهيد لوقت النفاس ، بتكونين كل شوي تقومين ترضعين ، فـ جسمك بيكون متعود عالنوم المقطع من ايام الحمل ، شايفين ؟ و عسا ان تكرهوا شيئاً وهو خير لكم

قبول تام لموضوع النوم المتقطع عادي مو قاعده اقاومه او ارفضه بل استقبله بكل حب

الحمدلله خلصت كل اغراض البيي قبل مااثقل ، باقي بعض الاشياء البسيطه اخذها اون لاين او من الصيدليه اذا قرب وقت الولاده . مثل الحفائظ و الفوط الصحيه و اللهايات و هالامور

مر الشهر الثامن معي و أنا في رمضان ، الحمدلله الصيام ماشي معي بأفضل شكل ، بالعكس حبيت طاقتي وقت الصيام أكثر من غيره ، تعرفون عشان مافيه الصعود و النزول في السكر الانسولين ، فـ طاقتي ثابته طول اليوم

حرصت أني مااتعب نفسي بالشغل كثير ، اعتمدت عالجاهز و المفرزنات ، علمت الخادمه على الشوربه و تجهيز التمر و القهوه و الماء و طبخ السمبوسه و خلاص ، انا يصير علي الطبق الرئيسي و السلطه

اكل مكملاتي بانتظام ، و اشرب فوق ٤ لتز ماء ( ضريبته اني بسكن بالحمام بس معليش عشان مانعطش 😅) و احرص اضل اكل و اشرب طول وقت الافطار

و الحمدلله ، مر صيامي مع الحمل بكل سلاسه و جمال بفضل ربي

دائماً مؤمنه أنه الصيام علاج و عمره ماكان أذيه ( ماأنزلنا عليك القرآن لتشقى ) ، و علمياً عرفت هالشي من خلال الابحاث اللي انعملت عالصيام ( ارفقتها بكتاب رمضان التغيير )

عموما الأشياء هذه لازم تطبقها الحامل بشكل عام سواء في رمضان أو لا

كالعاده نقص الهيموجلوبين عندي ( بكل حمل يصير لي ) و عرفت انه السبب هو تراكم النحاس عندي ، و مره ثانيه هذا اللي خلاني اخذ نظام مع د ويلسون ، النظام المفروض ياخذ ٦ شهور لين نشوف نتيجه ، انا توني شهر قبل الحمل كنت باديه فيه ، فـ ماامدا جسمي يتخلص من كل النحاس المتراكم ، النحاس يمنع امتصاص الحديد و يعبي مخزونه ، بالتالي يصير نقص بالهيموجلوبين وقت الحمل

المهم صرفت لي نسرين هذا المكمل توني ابدا فيه علطول بديت اشوف نتيجه حلوه ، هو من أعلى الفيتامينات جوده يوم قريت عنه الشركه مكوناتها و جودتها كثييير مشجعه

طبعاً مايسوي امساك و مستخلص عشبي طبيعي ، و امتصاص المكملات بالشرب اعلى من الكبسولات فـ نتيجته اسرع باذن الله

و بتكلم عن المكملات اللي ارشحها اخر التدوينه باذن الله

المهم عشان شد العضلات و الضغط اللي يصير عليها صرنا نحتاج الكثير من الاسترخاء ، بحمام بانيو مع ملح ابسوم او مغنيسيوم ، يفكك لك عضلاتك المشدوده و يريح بشكل فوري

صرت احاول اطلع اسبح بالبحر بالاوقات اللي مايكون فيها احد ( الظهر في رمضان 👌 البحر كله لك محد يفكر يطلع بهالوقت 😀 )

عشان الماء يرفع ضغط الجنين عن ظهري و منها اقدر ادرب عضلات افخاذي و ظهري بخفه تحت الماء

طبعاً لو حولك نادي فيه مسبح بيكون الأمثل لك ، ايام حملي بساره كان تبع اشتراكي فيه مسبح و كنت اسوي كل تماريني فيه و هذا كان سر قوة جسمي خلال الحمل وقتها و سرعة تعافيه بعد الولاده بفضل ربي

و بستمر على هالعاده لين الشهر التاسع باذن الله ، عالاقل المشي حافيه عالبحر رح يعمل ريفلوكسولوجي لأقدامك و يحرك لك الدوره الدمويه و يعادل شحنات جسمك و يمدك باليود و الصوديوم و البوتاسيوم و يرفع هرمونات السعاده و تحمل الألم عندك

عندي نيه اذا بدا عندي الطلق اروح امشي عالبحر ، نحتااااج اندورفين ( هرمون تحمل الألم و السعاده ) و هذا احد الهرمونات اللي تفرز بشكل طبيعي خلال الولاده اذا مااخذتي مسكنات صناعيه ، ندعمه بالمشي عالبحر طبعا و تنفس هواء البحر 💕 ( الناس اللي مش في مناطق بحريه انا اسفه 😢)

المشي حافي على العشب يعطي مفعول مشابه كذلك

الجنين الحين اكتمل نموه تقريباً ، لكن باقي شوي لتكون رئته جاهزه للتنفس لما يطلع ، و باقي حبتين دهون لتعبي جسمة اللطيف ، باقي هالشهر و الشهر الجاي رح يصير يكبر بشكل سريع ، مهم تحولين جلستك عالكره

عشان ينفتح الحوض و ينزل راس الجنين لتحت ، المفروض في نهايه هذا الشهر يكون نازل لتحت ، لا تشيلين هم اذا مانزل الحين ، عندك وقت لين التاسع لينزل

على طاري كرة الولاده ، كثير قاعده اسوي تماريني عليها مرره حلوه و مريحه

ملخص هذا الشهر :

ريلاااكس مثل كل شهر ، الكثير من حمام البانيو و اليوجا و الراحه و دلال النفس ، فيه بارت ثاني دبل لدلال النفس بالتاسع بعد حطي ببالك 😀

التاسع و الأخير /

اذا تابعتوا تدوينه حملي بساره ( رابط ) كنت مسميته شهر الانتظار ، الحين تغير تفكيري و حسيته لقب مؤلم ، ليش انتظر شي اعرف أنه مارده رح يجي ، مارح اقعد حامل للأبد ، و شعور الإنتظار متعب و يعرقل الحياة و يزيد التوتر ، شعور التوتر هو أكثر شعور مانبيه بهالشهر لأنه بيخلي الولاده تهرب ، توتر مع اوكسيتوسن ( هرمون الحب و اللي يشتغل الولاده ) مايجتمعون ابد ، عرفت أنه سبب تأخر ولادتي اللي فاتت هو توتر الانتظار و الترقب اللي كنت عايشته

فـ اقدر اسمي هالشهر هو : شهر العسل

قاعده اتفنن بأنواع الدلال و الفرح بهالشهر بالذات ، محضره له برنامج و ميزانيه من اول حملي ، عشان مايكون فيه عائق مادي للدلال اللي ابي اعيشه وقتها

كل يومين جلسة مساج حوامل أو مساج أقدام ، حجزت بشاليه لي و للاطفال استمتعنا كم يوم و سبحنا ( السباحه جدا جدا مفيده و كثير تريح اخر الشهور

اطلع مطعم في عشاء او فطور رومانسي مع زوجي أو أروح للمول احط بناتي ببيلي بيز يلعبون و أنا اتمشى بالمول و اطلب لي شي احبه من اي مطعم او عصير

على طاري العصير ، كلما بغيت اشرب عصير خليته اناناس ، فيه أنزيم البرومالين اللي يساعد على تليين عنق الرحم و تهيئته للولاده ، ماله مفعول يجيب الطلق مثل مايزعم البعض ( مع انه يجيب الطلق لكثير أمهات ، مو بسببه ، ممكن يكون الرحم و الجنين جاهزين للولاده بس محتاجين عنق الرحم يلين ، فـ بعد مايتسقبل الجسم البرومالين من الاناناس رح يبدا عملية الولاده ، لأنه الجسم مستعد ،، إذا الجسم مش مستعد مارح يسوي لك شي )

لكن أحب استهلكه بكثره لتليين العنق لوقت الولاده بس مو عشان ابي يجيب لي طلق

قاعده اكثف شربي لشاي ورق التوت لثلاث مرات باليوم ، و مكمله على مكمل د كريستوفر بيرث بريب

جلستي كلها عالكره و اسوي فيها تمارين دايم ، و الحمدلله شفت نتيجته الايجابيه بأنه الجنين راسه تحت و نزل عالحوض الحمدلله

برنامج الدلال و الحب لازم يصير حافل بهالشهر

أعرف أنه النوم صعب ، الحمام صار صديق ، الاخراج صعب ، و الثقل زايد القعده و القومه صعبه ،، عشان هالصعوبات بالذات لازم نعوض نفسنا و ندلل انفسنا بهالشهر

تلاحظين اني قلت دلللي نففسسسك لو بكوب شاي او وجبه تحبينها و اشتسعري السعاده و انتي تستمعين فيها

اكبر غلط تنتظرين الدلع و الدلال من اللي حولك ، زوجك ، صديقاتك ، عيالك مو مخليتك تتدلعين و البيت و المسؤوليات ؟

قد ماتقدرين طلعي الدلع و السعاده من نفسك و من قلبك لا تنتظرين ظروف تساعد على هالشيء لأنها مو كل يوم متوفره و محد بيقدر التعب اللي انتي عايشته غير نفسك ، و كذلك بيجيك شعور احباط أنهم مو حاسين بالتعب اللي انا فيه ، مو لازم احد يحس ، هذه مشاعرك الخاصه اللي انتي عايشتها محد يقدر يعيشها و يتفهمها صح

حرفياً صايره كل يوم اطلع ، لأني لو بقعد بالبيت بتوتر و بقعد اراقب جسمي و انتظر الولاده تجي ، و أعرف زين أنه هالشي بيبعد الولاده عني 😅 فـ أنسى الموضوع بالطلعه اليوميه أحسن لي ، حديقه او بحر أو أدور بالمول بلا هدف أو سوبر ماركت ، أمس مسكت معي أدور بممرات ايكيا كذا بس 😆 شريت فروزن يوجرت و انا طالعه و رجعت

و نسوي تجاهل لنظرات الناس اللي يشوفوني و يرحموني على كبر كرشتي اللي امشي فيها باين أني واصله 😂 و أنا وحده حملها بطنها يكبر ٥٠ متز قدام اذا حملت كنهم ٥ تواءم 😂💔 و لا طلعوا ألا نتف ، بس يمكن عشاني نحيفه مدري .

طبعا يوم دخلت التاسع دمي وصل ٨ ، ذكرت سابقاً سبب النقص ، بعد ٥ جرعات ابر حديد الحمدلله ارتفع و اعراض نقصه اختفت مني ، الدوخه و صفار البشره و كثرة النوم ، ومكمله على شراب الحديد اللي طلبته الشهر اللي فات و صار ١٠ و نص الحمدلله ، الطبيعي ١٢ لكن سعيده انه بارتفاع

بهالشهر الجنين جاهز للولاده ، كل اللي قاعد يصير انه كل يوم يكتسب وزن زياده و طبقه دهون اكثر ، و ينمو عقله اكثر ، و رئته تستعد للخروج للحياه اكثر

حركته قلت طبيعي عشان الرحم ضاق عليه ، و مشتاقين لشوفة ملامحه و ابتسامته و حركاته بين احضاني ، يارب نشوف هذا اليوم بأجمل شكل 💕

 

 

بعض الصعوبات اللي مريت فيها بهالحمل رح اذكرها لأشارك التجربه و أطمن اللي مروا بنفس حالتي و يارب ماتمرين فيها

الغثيان وقت الوحام و ذكرت الحلول اللي ساعدتني بأول تدوينه

دمي نزل مثل ماقلت و اخذت المكملات مع إبر الحديد و تحسن الموضوع الحمدلله و وصل لـ ١٢ مع نهاية حملي ، انصح باخذ المكمل اللي حطيته من اول الحمل او من الفصل الثاني من الحمل اذا كنتي معرضه لنقص الدم ، أنا بكل حمل لازم ينقص معي فـ كان شي متوقع

زيادة السائل الأمونسي ، أعلى نسبة أمنه هي ٢٥ ، أنا صاير ٢٩ و هذا سبب كبر بطني ، ماعرفت السبب تحديداً ، لكنه كان يزيد مع بناتي قبل لكن نسبه أقل من هالمره ، طبعاً مازاد ألا بالأسبوع ٣٩ و هذا اللي يطمننا أنه مافيه سبب خطير ، عادي أنه يزيد اخر الحمل و للحين ماعرفوا العلماء السبب تحديداً ، بمدرسة ويلسون ممكن يكون زياده بوتاسيوم و نقص صوديوم ( و أنا جسمي دايم يميل لنقص الصوديوم ) ممكن بسبب الأوميجا ثري بعد لأنه يرفع البوتاسيوم عن الصوديوم ( و بهالحاله ممكن اخذه الفصل الأول و الثاني من الحمل بس و على الشهر الثامن يتوقف ) ممكن بسبب كثرة شربي لماء جوز الهند بشكل مفرط و هذا يزيد البوتاسيوم ايضاً ، البوتاسيوم معدن ممتاز و مهم ، لكن لربما افراطي بعض الشي خلاه يرتفع ، لسا مااعرف ، و لسا مااعرف أثر هالشي عالولاده ، فيه دكاتره كانو يخوفوني و يسوسون بي و دكاتره يطمنوني و أنه مافيه أي تأثير ، و هذه نقطه مهمه أنك ماتسمعين لطبيب واحد ابد في أي مسأله طبيه ، احد الأطباء قال الأن المفروض ندخلك عمليه تأخرتي بعد 😅 و فورا طلعت منه لدكتوره ثانيه و قالت أنه بالغ ، النسبه زايده ٤ وحدات بس و مهما زادت ماله داعي عمليه ، لازم نتفهم أنه بعض الأطباء تجاريين و مايفكرون بصحتك قد مايفكرون براس مالهم ، و الحمدلله هالشي ماكان له أي أثر سلبي وقت الولاده

 

إلي اللقاء في تدوينة الولاده

 

كذلك يسعدني أكون شريكتك في رحلة حملك و ولادتك لتحصلي على أجمل تجربه ممكنه , فتحت باقات اشتراك التدريب الصحي للحمل و الولاده اذا حابه مساعده لتطوير تجربتك لأفضل شكل من هنا كل التفاصيل 💖