😅شايفين العنوان ؟ عكس عنوان حملي السابق 😀 يوميات حامل مخروشه أوي

ليش الخرشه ياختي روقي و استمتعي و عيشي كل لحظة حمل بروقان و جمال ، هذه معجزه قاعده تصير داخلك استمتعي فيها و استشعريها

صدمتكم بخبر الحمل صح ؟ 😅

<نقدت على أفنان الباتل يوم صدمت متابعينها بولادتها و صرت مثلها 🌚 عشان كذا لازم مهما كان مانحكم عالاشخاص من منظورنا ابداً ، مانعرف اللي يمرون فيه و مشاعرهم كيف وراء الكواليس ، عشت اللي هي فيه و حسيت بشعورها و عملت مثلها بدون ماأحس

شقول أنا .. مصدومه أكثر منكم .. صدمه دخلتني الطوارئ أول ماعرفت ،، اقول لكم التفاصيل بعد شوي

ماحبيت هالمره أعلن خبر حملي بالسوشل ميديا تحديدا لسبب وحيد فقط

كانت كثير تزعجني التدخلات او التعليقات اللي تجيني على كل أكل اصوره : انتبهييييي مايصلح للحامل ،، هذا عادي للحامل ؟ الحامل ماينفع تسوي كذا .. حتى الفاصوليا علقوا لي عليها ماتنفع 😅 المشكله اني واثفه من مصادري و عارفه زين ايش اللي يصلح و مايصلح مو محتاجه أحد يعلمني و يوترني أو يدخل فيني وسواس , بالعاده مايأثر فيني الكلام أبد ، لكن وقت الحمل الوحده حساسه زياده بسبب الهرمونات و هالشي خارج إرادتها

كنت حابه احافظ على توازني النفسي قدر الإمكان بالذات خلال هالمرحله

هذا غير تعليق : ماودلتي ؟ و انا توني بالخامس 🌚 أحنا نتضايق منه اذا وحده او ثنتين صاروا يسألوننا ، فما بالكم كل يوم ألفين تعليق نفس الشي

 

ماحبيت أتوتر و أوتركم معاي

 

حتى التدوينه ماكنت بكتبها

 

لكن تعرفون ايش صار ؟ 😢

كنت احس اني وحيده تعودت على وجودكم و مشاركتي لكم كل شهر بشهره ، كنت اتحمس اسجل المعلومات و اركز بشعوري و ايش سويت عشان اكتبه بالتدوينه ، ماتتصورون شقد كان يحمسني تدوين حملي ، احس أنكم معاي بمراحلي ، ماتتصورون شقد افرح بالأمهات اللي يتابعون اشهرهم معاي و يشاركوني مشاعرهم و احداث حملهم معاي ، فقدتكم كثير 💕💕

 

و معلوماااات جديييده حلللوه تعرفت عليها بهذا الحمل ماقدرت اني مااشاركها معكم 😍😍

لما أدون و أكتب نصايح بخصوص نفسيتك و عنايتك بنفسك خلال الحمل ، أكون أكتبها لنفسي قبلكم ، اهاوش نفسي قبلكم لأني أنا أمر بأوقات أكون فيها down بعد و احتاج أحد يذكرني أني لازم اضل ايجابيه

العلم اللي تعلمته لازم اشارك زكاته معكم و نمر كلنا بحمل صحي فطري طبيعي سعيد

طولت المقدمه ، كلام من القلب رميته بدون اي مراجعه و تخطيط ، عفوي من القلب أتمنى يوصل لقلوبكم بكل حب 💕

 

الشهر الأول /

مر بدون ماأحس ، تأخرت الدوره اسبوعين ، كنت احس بأعراض غريبه ، لكن طنشت ، اللي يعرف من قبل كنت ماشيه على نظام د ويلسون ، اخذ مكملات و اكلي شبه كيتو ، فـ متوقع أنه الدوره تتأخر ، تجيني دوخه من قلة السكر بنظامي عموما ، كثرة النوم عشان الجسم يتشافى و فيه مكملات تساعد على النوم أفضل ، فـ توقعت انه كله طبيعي ماشلت هم و لا سألت و لا حللت

بديت أحس بلوعه على اخر الأسبوع الرابع ،، لوعه مو طبيعيه ، و اشتهي أكل و يجيني غثيان من اكلات معينه و روائح

هنا خفت ،، و كملت تطنيش ، لكن في قلبي أعرف أنه فيه شي ، لكن أسوي نفسي ماكأن فيه شي

مع العلم أنه كنا مانعين الحمل ، بطريقة العد ، فـ التاريخ اللي حصل فيه تلقيح المفروض يكون صحيح ، لكن الواضح مع نظام ويلسون يطول فترة الخصوبه ، فـ بدل ماتكون ٥ ايام صارت ٢٠ يوم ( حسب كلام دكتورتي بعد ماحللت )

و فعلا سمعت هالشي من كذا بنت عملوا نظام ويلسون و حملوا بدون تخطيط حتى بعضهم مع الرضاعه و بعضهم من سنوات ماكانوا يقدرون يحملون و حصل لهم الحمل بإذن ربي مع النظام

الشهر الثاني /

ماما قالت لي حللي دام عندك شك ، بس عشان تتطمنين اذا مافيه حمل تكملين نظامك بسلام و تسوين رياضتك براحتك ( كنت طايحه بكلاسات بوكسنج وقتها )

طلبت تحليل الحمل اول لاين من الصيدليه ( حتى ماانتظرت لين يجيبها زوجي بالليل ) المفروض تتسوي اول ماتقومين من النوم ، لكن قعدت اهوجس بسريري ساعتين ماقدرت انام ، قلت خل اروح احلل الحين ( في بالي بغش نفسي اسويه بالليل عشان مايضبط و يبين لي سلبي و اتطمن مافيه حمل 😂 مدري على مين ألعب أحيانا من الرجه مانعرف كيف نفكر 😂💔)

لكن النتيجه كانت صارمه ،، خطيت واضحين وضوح الشمس من اول جزء من الثانيه ، رجعت اقرا التعليمات يمكن هذا نوع تحليل جديد معكوس خطين يعني مو حامل ،، لكن .. أمر ربي إذا أراد ، بيصير الشي بالرغم من الظروف ، و أجمل شي صار 💕

رحت سريري ، انكتمت ، دقيت على زوجي يجي بسرعه ( كان بالمجلس لكن من الروعه و الصدمه ماقدرت اقوم من مكاني )

دخل علي : وش فيييك 😱

أنا أشاهق و أأشر على صدري أنه ماأقدر اتنفس (الرجال يحسب فيني جلطه فجعته 😂) قلت حامل 😭😭😭

حمد ربي و هداني أنه معليش رزق من ربي

أنا علطول قمت أقول : طيب ساره ؟ مره ثانيه وحام .. ولاده .. ثقل .. طفل رابع .. كورونا و منصه أطفال مايروحون مدرسه و لاحضانه كيف اشيل الأربعه لحالي 😭😭😭

تعرفون كيف اول ماتسمعين خبر الحمل أول شي يطري ببالك المستقبل و اللي رح تمرين فيه ( مع انه كله بيمر سهالات ) لكن وقع الصدمه كان كبير علي و ماكنت مستعده لهالشي ابد ،، يمكن لو جاني الخبر بوقت ثاني و ظروف أفضل كان بتكون ردة فعلي أفضل

لكن تعرفون الضغوطات اللي نمر فيها كأمهات بـ ٢٠٢٠ ، أطفال بدون مدرسه عندك ٢٤ ساعه ، مافيه حضانات او مراكز يفرغون طاقتهم فيها ، أنا أدرس و كنت احضر للبعثه ، اشتغل بالبيت و اطبخ و أنظف ، كنت ٢٤ ساعه اشتغل معهم حتى لاحظتوا كيف وجودي بالسوشل ميديا قل كثير .فـ جاء خبر الحمل كصدمه بالنسبه لي شي ماكنت مستعده له ابداً

خصوصا أنه من وجهة نظري أفضل فاصل بين الأبناء مو أقل من ٦ سنوات و أنا كثير أتبنى هالفكره و ساره لسا سنتين توني افطمها ، فـ شي كان خارج التخطيط ، لكن خيره ربي أعظم و أحنا واثقين من هالشي بإذن الله 💕

أثر الصدمه طول معي ، ثاني يوم قعدت فيه بالطوارئ تكرمون ترجيع و إغماء ، المشكله عشاني حامل ماأعطوني شي ، فقط مغذي عشاني مااكلت طول اليوم

رحت لأهلي عشان يعتنون ببناتي أنا ماكنت اقدر اقوم اسوي لهم اكل او اهتم فيهم ، الحمدلله دعم الأهل و جودهم دائماً نعمه ربي لا يحرمنا منهم 💕

الشهر الثاني مر بألم للأسف ، مو بسبب الوحام ، تذكرون كيف وحامي أليم كان بحملي السابق و كل حملاتي

هالمره كثير خف ، عالاقل اقدر أكل لقمه لقمتين بدون ماتطلع 😅هو فقط لوعه خفيفه ، يوم بحثت بموقع ويلسون يقول الوحام تفسيره كبد مرهق و محتقن ، حقنة القهوه تساعد بتخفيف الإحتقان ، و اللي ملتزمين على نظامه سنتين رح يرتاح كبدها  ولا رح يمر فيها وحام مزعج ، و فعلا في تحليلي معاه كان معاي احتقان كبد و كلى ( بسبب تراكمات من الطفوله )

المصدر

حسيتوا معي .. أنه : ياضعفي .. و أكيد أنتوا حسيتوا بهالشيء معي 😅 ليش موقف صغير زي كذا هز كياني وزلزل حياتي و قلبني فوق تحت 😅 طبيعي اللي مريت فيه يالأمهات اللي حملوا على طفلهم بالغلط و لا بالغت ؟ 😅

بمساعده الأهل .. مر الشهر الثاني بأقل الخسائر 😅😂

 

 

الشهر الثالث /

هنا بديت أصحصح من الصدمه و استوعب اني حامل حقيقي و خلاص نغير كل خطط حياتنا اللي كنا مخططينها و نستعد لإستقبال طفل جديد ، أحتاج خادمه كفو لمساعدتي مع الأطفال و أتنازل عن شرط ( ماتطبخ ولا تمسك طفل ) لا بأس بطلب المساعده ، و  ماأعرف عن الظروف الماديه و المعنويه اللي بتصير لي بالمستقبل ، لكن عشان أطمن نفسي أنه ” كل شي سيكون على مايرام و لكل عقبه حل ” أسجل ساره بحضانه أو أي شي لتتعود تنفصل عني و يكون لي وقت مع المولود ، بعد ٧ شهور من الآن رح تكون المدارس رجعت اكيد ، بيرجعون الأطفال للمدرسه و يرجع يترتب نومهم ، و يكون عندي وقت الصباح للتفرغ للطفل كذلك ، والبعثه معوضه خير ان شاء الله بعد مايكبرون الإطفال ممكن ألقى فرصه أفضل ، ربي كاتب لي العوض الأفضل باذن الله

لا لا نوره مايحتاج تشيلين هم كل شي بيكون بخير ، مشكلتي اللي احتاج اشتغل عليها أني اشيييييل هممم ، الحل اللي أوجدته لنفسي بهالموضوع هو أني اكتب كل الحلول الممكنه و الغير ممكنه قدامي ، plan A , B , C خلاص بكذا بتكون صورة المستقبل واضحه قدامي و اتطمن ، مااعرف اذا هالطريقه صح او تنفع للكل ، لكن عقلي يشتغل كذا ، المهم عموما في أي مشكله نمر فيه نضل نبحث و نوجد الحلول ، هذا لحاله بيقودك للطريق السليم في حياتك

واضح أني من زمان ما سولفت مع أحد و فيني طاقه سوالف كبيره 😆

نرجع للحمل ، الوحام هالمره مختلف عن وحامي المرات اللي فاتت ، فقط غثيان بدون ترجيع مستمر ، مره او مرتين باليوم ، لكن اقدر اكل

 

طلبت هذا المنتج من اي هيرب كان رااااائع ، من الطب الهيموباثي ، كان كثير كثير يريحني نفس مفعول دواء الغثيان اللي بالصيدليه ، لكن هذا من عشبة عرق الذهب بس

كذلك نفس الحبوب اللي طلبتها بحملي السابق كنت احطها بفمي لما اركب السياره ، اكثر وقت اتضايق فيه من الغثيان فـ هذه تنسيني شعور الغثيان شوي ، مكوناتها ستيفيا و عصير طبيعي

هذه جيده نوعا ما ، زنجبيل نصحني فيه ويلسون للغثيان اني امضغ قطعة زنجبيل لكن ماكنت اقدر عليه فطلبت هذه ، فيها حرارة زنجبيل ، لكن حلوه حتى لمشاكل بطني مع لخبطة الأكل وقت الغثيان كثير كان ينتفخ بطني

 

طبعاً أرسلت ايميل عن طريق مشرفة حالتي د نسرين (حسابها) عن ايش افضل شي اسويه للوحام و هل اكمل بمكملاتي او لا

قال افضل اقسم اكلي و ماأجوع ابداً ، اكل اشياء بسيطه كل شوي ، افضل تكون هذه الاكلات مصادر بروتينيه مو سكريه و نشويات ، السكر بيرفع الطاقه بشكل عالي مفاجئ بعدها رح يهبط بنفس القدر المفاجى وقتها رح يجي الغثيان بشكل اكبر ، كذلك كثير نصحني بالزنجبيل ، شرب الشاي تبعه او اقطع زنجبيل فريش و اكله اذا اتحمل حرارته ( فـ طلبت الحبوب اللي وريتكم من اي هيرب )

فـ أكلي طول الوقت على شكل سناكات و لقيمات ( جمع لقمه مش لقيمات الحلا 👊 ) من بعض الأكلات

قطع دجاج تشكين ناجت بالقلايه الهوائيه – سلقت حمص كميه و صرت اكله كل شوي – شويه فول ، طحت بالزبادي اليوناني بارد يبرد علي – كراكزر صحي يكون مصنوع من البذور و الكتان مثل هذا

تشيبس الحمص او الكينوا ،، الأشياء المقرمشه تساعد على تشتيت شعور الغثيان

 

 

مكملاتي استمريت عليها مع ويلسون ، كان يقول كملي عليها مفيده جدا للحامل ، هي اساساً فيتامينات بجوده عاليه مجمعه بطريقه كيميائيه موزونه بحيث ماتسوي تراكم و تفاعلات ، و فيها فوليك ، و فيه اوميجا ثري و غيره من الفيتامينات المفيده للحامل اساساً

و أنا في منتصف الثالث الأسبوع الحادي عشر الوحام كثير كثير خف ، احس الحين طلعت و وعيت على الدنيا ، تقبلت الحمل و بديت احس و افرح فيه ، طبعاً هالمره قررت حقيقي امر بولاده حلوه و اسهل من كل اللي قبل ، ولادتي بساره ذكرتها قبل ، كانت حلوه و فيها كنترول ، لكني اطمح للأفضل

تخيلوا وش صار ! بأول يوم عرفت فيه أني حامل ، مسكت جوالي أبي أشتت أفكاري عن شيلة الهم ، وقعدت اشوف رسايل الدايركت بالانستقرام ، لقيت الحبيبه “نوران ” مرسله لي اعلن عن دوره الولاده بدون ألم بتقنية الهيبنوبرث !! 😍 فجأه كذا أرسلتها لي حتي ماتعرف اني حامل ، طبعا بيني و بينها معرفه سطحيه تقريبا من قبل ، كثير احب حسابها و اعلم الأمهات اللي يبون يتعلمون اكثر عن الرضاعه الطبيعيه امنشنهم عليها خصوصا انها مدربه رضاعه طبيعيه كذلك ، أول شي سويته اني علطول فتحت اللاب توب و سجلت بدون ماأنتظر و أفكر

بديت بأول فديو ، مشيت لين سادس فديو ، اعتكفت على فديوهاتها ايام ورا بعض

وااااه على قدر المعلومات القيمه جدا اللي فيه ، و كيف تطرقت لكل شي بخصوص الحمل الولاده ، و اثبتت لنا علميا كيف أنه الولاده الفطريه الطبيعيه فعلا المفروض تكون بدون ألم

تعرفون قصص جداتنا “اللي مانصدقها 😅” لما يقولون الحرمه أول تشتغل بالحقل ، تروح تولد ٥ دقايق و ترجع تكمل شغلها عادي ،، شخصيا كنت أقول ويييين مبالغه و من وحي الخيال 🌚

طلع فعلا حقيقي ، طريقة الهيبنوبرث هي طريقة الولاده مثلهم ، تولدين و انتي سعيده ، عارفه جسمك و هرموناتك كيف قاعدين يشتغلون ، و كيف كل خليه فيك و بجسم طفلك قاعدين يشتغلون عشان تمر هذه العمليه بسلام بدون تدخل طبي ، رح تحسين بالأمان و الإطمئنان للي ببصير ، و مايكون عندك تخوف من الولاده ، الحين بدل ماأكون أبي أدخل الولاده كمعركه ( و تلاحظون قلت هالكلمه بحملي السابق 😀 ) بكون داخله عليها مثل العروس 💕 بفرحه و لهفه سعاده للعمليه الفطريه الجميله اللي بتصير ، و للقاء طفلي الجميل

حقيقي بنات أنصحكم تبحثون عن طريقه الهيبنوبرث ، أو اختصروا البحث و ادخلوا الدوره مع نوران ، من جد أبيكم تستفيدون و تتعلمون هذا العلم اللي تعلمته ، خصوصا أنه سعرها معقول جدا ، داخله و أنا أقول حتي لو طلعت بألفين ريال رح اخذها 😐 طلعت ولا ربع السعر 😅 الدوره هذه كنز حقيقي لكل أم تبي تولد بطريقه فطريه جميله و سعيده

ليش قاعده اقول لكم ياها من الحين ؟ لأنه كلما اشتغلتي على تمارين الدوره من بدري كلما صار تطبيقك لها وقت الولاده بديهي لعقلك و أفضل ، كثير أمهات كانوا معنا بالدوره مادخلوها الا عالثامن و التاسع و جت الولاده من التوتر ماعرفوا يطبقون شي و صارت تدخلات طبيه ماكانو يبونها ، فـ كلما بديتي فيها أبكر كلما كان أفضل لك

هذا رابط الكورس

الحين التخوف من الولاده رح مني الحمدلله ، الوحام بدا يخف ، الحمدلله الباقي سهل

نروح لفقرة : نفسسسك

لما أكون بحالات شوي down و أبي ارفع معنوياتي اكثر ، اخذ حمام بانيو بأملاح ابسوم تروقني ، اعمل تمارين تنفس ، تأمل مثل اللي علمتنا ياه نوران ، بعدها اعمل ماسك و اشغل شموع و أروق ( كله بعد ماأنوم أطفالي ) صحيح رح اخسر كم ساعه من نومي لكن المهم نفسيتي تتحسن ، اقعد اقرا كتاب أو اشوف مسلسل او يوتيوب و أنام براحه و نفسيه احسن ، اصير من بكرا جدا مروقه و عندي حافز لأعطي عائلتي بشكل أفضل

لاحظت كلما اهملت نفسي ضغط هذا الإهمال علطول يطلع على أطفالي ، و كلما عطيت نفسي أكثر كلما روقت أكثر لهم و قدرت أعطيهم أكثر

أهتمي بنفسك بالأول ، مهما كان عندك مسووليات ، أنتي بالأول ، مارح تقدرين تنجزين بهذه المسؤوليات ألا إذا شحنتي نفسك بالطاقه ، أي شي يسعدك سويه ، لا تحطين شي بخاطرك ، أي تفصيل صغير يسعدك لا تتقاعسين بعمله لنفسك ، كوب شاي أعشاب ، شموع ، جو حالم هادي ، بانيو استرخائي ، ميك اب حتى لو بالبيت ، علاج بشره ، مساج أقدام ( تربعي و اعملي مساج لأقدامك تذكرت د ويلسون كان ينصحني بهالشي للوحام كذلك ) أي أي تفصيل صغير يسعدك اعمليه ، ليش مركزه عالتفاصيل الصغيره ، لأن صغير صغير صغير رح يتحمع على بعضه و يعمل طاقه سعاده أكبر ، ماتبخليييش على نفسك

 

بخصوص المكملات اللي تنفع للشهر الأول من الحمل /

الميثيل فوليك و هو الصيغه الأفضل للامتصاص عكس الفوليك اسيد اللي ممكن يكون ضرره اكبر من نفعه

للاإستزاده

دراسات لقت أنه ليثين دوار الشمس يساعد على حمايه الجنين من التشوهات ، استخدامه اختياري كمالي مش مهم ، خصوصاً أنه الدراسات هذه كانت ضعيفه ، لكن مايضر عموما فوائده للأعصاب جميله جدا و لا يتعارض مع الحمل

مصدر

 

شيكي على فيتامين د و الهيموجلوبين عندك اذا تمام او يحتاج تعالجينه ، ماتحتاجين كالسيوم او حديد حالياً

فقط الكثير من الخضار المطبوخه هي الأفضل و البيض ممتاز لأول الحمل و اللحوم ذو الجوده العاليه و أفضلها الغنم ثم الأسماك ثم الدجاج بالأخير

 

 

كذلك يسعدني أكون شريكتك في رحلة حملك و ولادتك لتحصلي على أجمل تجربه ممكنه , فتحت باقات اشتراك التدريب الصحي للحمل و الولاده اذا حابه مساعده لتطوير تجربتك لأفضل شكل من هنا كل التفاصيل 💖

 

إلى اللقاء في الجزء الثاني من حملي 💕