بانكيك الشوفان مع جميع اسرار نجاح البانكيك

 

 

مرحب

مره افطرت بفندق و المفروض انه النفادق تعطي اعلى مستوى لجودة الأكل أو أي مطعم فاين داينيج و اكون دافعه فيه المفروض يكون سقف توقعاتي عالي لهالمكان < وحده متأثره بطلال الراشد ?

المهم انه يوم طلبت بانكيك أمم كيف اوصفه ،، كان قوامه بالضبط كأنك تحاولين تاكلين بلونه

كان عجين يمغط و بصعوبه ينقطع بالسكين و لون العجين اصفر كنت اعطيه تقييم 0/10

و يوم رحت اشوف الشيف كيف قاعد يطبخ البانكيك ، لقيته يستخدم نفس عجينة الكريب للبانكيك + يصب البانكيك على صاج ناره هااااديه جدا عشان يروح ينشغل بغيره ، و بعدين يرجع له اذا نضج مره من وجه واحد يقلبه شوي بس و يقدمه ، و للأسف كان شي مايتقدم ?

المهم وقتها عرفت أنه حتى الشيف اللي بالمطعم ممكن يكون مايعرف قواعد طبخ البانكيك او اسرار نجاحه

فـ يالله نتشارك اهم اسرار نجاح البانكيك

طبعا بقولها بشكل عام برا موضوع الصحه ، اذا فيه شي مو حابيه تحطونه ممكن تسوون بدائلكم فيه او تطبقون سر و تخلون اللي ماتحبون تطبقونه

ممكن تسوينها كلها ، و ممكن بعضها ، وممكن واحد منها ، بس هذه الاسرار لازم الكل يعرفها

 

1. اضافة بيكربونات الصودا لخليط البانكيك ، هي اللي تخلي البانكيك هش و فيه قرمشه خفيفه من برا

2. البيض : فصل صفاره عن بياضه و خفق البياض حتى يصبح كريمي ، ثم اضافته بالاخير ( مع اضافة الصفار لباقي الخليط )

3. اضافة اللبن او الزبادي أو حتى مصل اللبن للخليط ، جدا بيفرق معكم الطعم و القوام و النفشه ?

4. خلط المكونات الناشفه لحال ، و السائله لحال ، ثم اضافتهم لبعض

5. ممكن اضافة بقايا جوز الهند او اللوز اللي عملنا فيهم حليب نباتي للخليط

6. اول حبه تكون تجربه بالعاده ، لتعرفين الحراره المناسبه اللي بتطبخين فيها و تتأكدين انه الخليط ممتاز مايبيله اضافة حليب او طحين

7. بعد مانصب الخليط ، بعد دقيقه او حتى تتماسك الأطراف نقلب الشريحه حتى لو وسطها رطب ، عشان تنتفش اكثر

 

وهذه أحد اهم اسرار نجاح البانكيك بشكل عام

الحين نجي لوصفتنا

المكونات /

• 1 ك شوفان مطحون ( اي شوفان عندك اطحنيه بس )
• 1/2 ك طحين قمح كامل
• 2 بيضه
• 3 م ك محلي طبيعي
• 1 م ص بيكربونات الصودا – بيكينج باودر
• رشة ملح
• 1/4 ك زيت جوز هند
• 1/4 ك لبن
• 1 ك حليب نباتي

الطريقه /

1. نخلط المكونات الجافه في وعاء و المكونات السائله في وعاء اخر
2. نفصل البياض و نخفقه حتى يصبح كريمي
3. نضيف جميع المكونات لبعض و نخلطها كلها حتى تتجانس
4. يصب الخليط في صاج او مقلاة على حرارة وسط
5. يقدم مع شراب القيقب او العسل

صحه?