يااأهلا و سهلا
طبعاً بما أنه مافيه سفر دولي هالفتره الكل اتجه للسياحه الداخليه و صرنا متحمسين نستكشف هالبلد ، أنا من السنه اللي فاتت عندي هذا الفضول لاستكشاف أماكن أكثر في السعوديه ، و وقتها زرت الباحه و النماص و تنومه و صزمنا الجمال اللي هناك ، فـ أصبح الحماس أكبر بهذه السنه لزيارة أبها بما أنها مزار سياحي منذ القدم في السعوديه
أهم شي لزيارة الجنوب هو سياره تتحمل ( الجيب أفضل ) لأن المنطقه جبليه و أغلب الأماكن تحتاج جيب لوصولها
ثاني شي ( عزبتك معك ) مع أني معروف عني أني مااحب اخذ شي معي السفر و سبق قلت هالشي بتدوينه تجهيزات السفر
لكن لرحله داخليه مثل الجنوب ، الخدمات شحيحه نوعاً ما ، أفضل شي تكون عزبتك معك ، دلة الشاي و القهوه و قلاية ، قدر ضغط و اشتري من هناك عين غاز صغير للطبخ و اغراض شوي مثلا كاسات و ملاعق و سكين و غيره
نفعتني كثير بالرحله لأنه المطاعم هناك خذلتنا كثير ، فـ صرنا نشتري المكونات الطازجه من هناك و نطبخها احنا
فيه منطقه كلها مقاهي هناك و خدامتها رائعه رح احكي لكم عنها ، لكن اكيد مو كل يوم رح اقعد فيها ، رحلتنا كانت استكشافيه أكثر من رفاهيه
نبدا بالسكن /
فيه ثلاث فنادق اعتبرهم الأفضل من خلال بحثي و تجربتي و تجربة غيري في زيارة ابها
أول شي رح اذكر تجربتي بالفندق اللي سكنت فيه
الفندق جددداً نظيف ، سعره معقول ، و خدماتهم سريعه ، جديد جدا ، يوم جينا كان له اسبوعين بس فاتح ، فـ مو معدوم من السياح
موقعه قريب من كل شي ، كل مشوار يبعد عننا ٧-٤ دقايق بالسياره
أرشحه كثير
فنادق اخرى عليها مدح في ابها
موقعه جبار في نفس السيتي هاي ، حوله منطقه حيه كلها مقاهي و اطلاله علي حديقة الخيال و التلفريك
الانتركونتيننتال ابها كان قصر للملك فهد ايام الثمانينات و تحول فندق
شاليهات شاهين شغل فاخر و راقي للي يبون الرفاهيه
الاماكن الجميله
طيب ، احنا رحنا للاماكن المشهوره في ابها و اللي الكل يروح لها مثل المنتزهات و المطلات ، بصراحه ماحبيناها من الزحمه و قذارة بعض البشر للاس برمي الزبايل و انتو بكرامه في كل مكان ، حرفياً يقعدون يحطون اكلهم و ياكلون و يقومون يخلونه مثل ماهو بدون اي تحريك ، قواطي البيبسي و الرز المتناثر و قراطيس الحلويات ، اخخ مابي اتكلم بهالموضوع الحين لكن رساله لاي احد يروح ابها ارجووووكم نظفوا بعدكم ارجوكم
صديقنا في الرحله هو جوجل ماب ، رح احط لكم روابط الاماكن اللي رحنا لها و اعجبتنا الجلسه فيها كثييير احسن من الاماكن الزحمه اللي عادمينها الناس
حديقة أبو خيال /
حديقه جديده تفتح النفس ، فيها مطعم اطلالته تجنن و العاب للاطفال و جلسات كثير انصح فيها
سبت بني رزام /
منطقة زراعية ، كلها مزارع مباني حجريه قديمه ، اللوكيشن يوديك على سوق بني رزام اللي يعود زمنه لثلاث الاف سنه ، طبعا المكان مسكر لكن تقدرون تشوفون المباني حقته من برا
اقترح تستأذنون من اصحاب الاراضي قبل ماتقعدون فيها ، احنا شفنا صاحب احد المزارع و استأذن لنا بالجلوس و رحب فينا ، اخذنا فطير و عسل من الطريق و عملنا الشاي و استمتعنا .
ممشى حديقة الفن /
المكان جديد و حي يفتح النفس ، فيه سوق مزارعين بسيط و مشاريع منزليه و عسل و سمن و من هالامور الجميله ، اشتروا من فواكه الموسم و اقعدو بالجلسات و استمتعوا بالاجواء الجميله
كذلك فيه جنبه مثل معرض للفنون ، المباني فيه تجنن على الطراز الشعبي العسيري ، و فيه رسامين و متحف و ورش فنية ، كذلك فيه مقهي لطيف جلساته تجنن هناك
قرى بني مازن /
قرى مترامية الاطراف غرب ابها ، قفلوا الجوجل ماب و ضيعوا هناك 💜💜 كل مكان احلى من الثاني ، جبال خضراء و مزارع و مزارعين يبيعون انتاجهم الطازج عالطريق ، المنطقه مليانه منتجعات و مزارات لكن ماحصل نمرها كلها فل ماشاء الله
لقينا لنا مكان مناسب حول مزارع و قعدنا فيه
منتزة المزرعه الريفي /
المكان لطيف و منعش كله اخضر ، تقدرون تجيبون غداكم و تستأجرون جلسه بين الاشجار في المزرعه و تقدرون تطلبون من مطعمهم ، يعيبهم سوء الإداره و الزحمه ، لكن المكان جميل جداً و فيه ركوب احصنه و العاب اطفال
كرفانات السوده /
اعتقد انها بتكون تجربه ممتعه جدا السكن بكرفان في منطقه رائعه مثل هنا ، اتخيل منظر الشروق صباحاً من ورا الجبل الاخضر ، لولا ازعاج ماطورات الكهرب كان سكنت فيه
قرية شرمه /
القريه اللي لقينا فيها مكاننا السري ، جدول الماء الجميل المنعش ، مكان مثل الجنه 💕 جدول صغير حوله تشكيلة اشجار مع الكثير من الحبق الجبلي اللي ريحته مغطية المكان ، شرينا بيض بلدي و سمن من سوق المزارعين ، و اخذت خبز من يد طباخه حنونه ، و افوكادو من الدانوب و افطرنا عليهم هناك
و صور عامه قريبه من المنطقه ، انتو ادخلوا بين الحواري و القرى رح تشوفون مباني تاريخيه عجيبه
سوق الثلاثاء /
سوق شعبي يقام كل يوم ثلاثاء ، تلقون المزارعين و اصحاب الاعمال اليدويه من خوص و طباخات يبيعون انتاجهم ( أححححب اللي كذا ) اذا تبون تاخذون انواع دقيق ( شريت ٢٠ كيلو قمح الجنوب بدون كيماوي بـ ٦٠ ريال ) ، العسل و السمن و اطواق الورد و الخضار و الفواكه المحليه كذلك الذره البيضاء و الحمراء ( نوع دقيق صحي خالي جلوتين للمخبوزات )
جنبه علطول سوق شعبي عندهم الملابس الشعبيه العسيريه و الفخاريات و المغش الحجر و غيره
( عند منتزه السوده فيه سوق شعبي مثل كذا كذلك )
متحف تهلل /
صاحبة المتحف حليمه عسيري ، من ألطف الناس اللي قابلتهم ، بالرغم من كبر سنها ألا أنها تشتغل على هواياتها و ابداعها للحين ، متخصصه في فن القط العسيري و معتمده من مؤسسة تزكواز للوليد بن طلال في هذا الفن كأول إمرأه تبتكر ألوان من الطبيعه ” من الحجر و الاعشاب ” ، المتحف في الكثير من الآثار بعضها تعود لآلاف السنين ” ، المتحف انصح بزيارته بقوه ، ادعموا الخاله حليمه واضح كثير تعبت على الشغل في المتحف لكن الزوار قليل ماعرفوه ، المكان حقيقي ممتع و يستحق الزياره ، أقول لكم سر ؟ جيبوا معكم مطاره و عبوا من ماء البئر اللي عندها ، للحين اذكر انتعاشه كيف كان 💕 ، أول ماذقته قلت لها : أنا كيف بعده بشرب ماء قوارير 😫
المدينه العاليه high City /
ماقدرت اصور المكان لأن كل مره يكون زحمه جداً ، المكان حديث و صاخب ، منطقه تذكرني بالسيتي ووك مثلاً ، كلها مقاهي مختصه و كم مطعم ، فيه اطلاله من فوق الجبل ، فيه مكان العاب للاطفال ، المكان ممتع و يوسع الصدر كثير اعجبنا .
مزرعة شموخ /
ماقدرت اروح لها للاسف على كثر ماكان خاطري ازورها ، المزرعه فيه جلسات كثير مرتبه ، يقدم أكل شعبي عسيري و عالمي ، المكان كله من ادارة اهل المزرعه ، الاب و الأم و الجده و الابناء كلهم يشتغلون فيها فلكم ان تتخيلوا الحب المقدم في هذا المكان 💕
نصيحتي لكم عشان مايفوتكم المكان ، تحجزون من قبل ماتسافرون اصلاً ، أنا ماكنت حاسه بجديه هالامر ، يوم وصلت هناك جيت احجز لقيت اقرب موعد بعد رجعتي ، فـ انصحكم احجزوا بدري مره لأنه دايم فل ربي يبارك لهم ،، الحجز عن طريق موقعهم الموجود في خرائط جوجل اللي ارفقتها
الأكل /
أبها فيها الدانوب ، ذكرت الاماكن اللي تشترون منها اشياء محلية ، المطاعم جربنا كذا مطعم و للاسف كثير خيبوا ظننا ، الواضح اهل ابها يطلعون يتقهوون ، و الاكل بالبيت بس 😬 القهاوي المختصه بكل مكان ماشاء الله ، لكن المطاعم 💔 حتى جربنا الاعلى تقييم لكن طلع شي ماينوكل للاسف
المووهيم ، احسن مطعم جربناه بالصدفه
البيت بيتك
اف يااكلهم شقد لذيذ ، المطعم يمني ، اكلهم جودته عالي ( مااقصد صحي ) الطبخ في قدور حجر ، طلبنا منه سفري ، و ثاني مره دخلنا له ، فرق كبير جدا ، لانه يكون فريش و يقدم لك بالمغش و هو حار ، كان فارق اللذه كبييير ، طبعا المطعم جدددا متواضعه جلساته ، جدا ، لا تتوقعين شي خيالي و مرتب ، سوو سكيب للمكان و بس ركزوا عالاكل 😩💕
جربنا كل شي كان لذيذ ، مافيه طبق قلت له عادي ، كله اوفر لذيذ ، قلت ضروري اقابل الشيف و اساله عن اسراره و هل يستخدم ملح صيني اجيناموتو و لا من هالامور
حكانا انه المكونات كله طازجه حتى ماياخذ المجمد مثل الملوخيه و الباميه ، البيض بلدي ، الفاصوليا و الحمص و الفول حب يطبخونها مش معلب و ينقعونها لين تتبرعم عشان تصير خفيفه عالبطن ، البهارات خلطاتهم ، مايستخدمون زيت بالطبخ كله سمن مستورد من اليمن ، التفاصيييييل هذه خلت اكلهم حقيييقي لذيذ ، هذا المطعم الوحيد اللي اقدر ارشحه لكم ( قلنا من ناحية الاكل مش الجلسات )
ثاني شي احب ارشحه هو الاكلات الشعبيه الجنوبيه ، العريكه و المشغوث و التصابيع و غيرها ، مافيه مطاعم تقدمها ، لكن فيه مشاريع منزليه تقدرون تطلبون منهم و يوصلونها لكم لمكان سكنكم ، ممكن تاخذونها معكم و تاكلونها باحد الاماكن الجميله اللي وصفتها لكم قبل
أم عبدالعزيز هي اكثر طباخه مدحوها لي في أبها ، طلبت منها عريكه بيوم العوده ، للاسف اني ماعرفت رقمها الا قبل مااروح ، قلت مابي اطلع من ابها و انا ماجربت العريكه حقتهم ☹ و الحممممدلله و شكرا للجميله ريم اللي اعطتني رقمها ، لذيييييذ يبرد الخاطر و يجبر الاحاسيس ، نكهة الحب واضحه في الاكل 💕 و وصفتها حسيتها عريييكه صصصح مثل ماياكلونها اهل الجنوب ، اذا تبون اكل شعبي يبرد الخاطر بعد هي اللي اقدر انصحكم فيها و انا متطمنه ، تسوي كل شي على فكره
و هذا تقريبا كان كل شي بخصوص رحلتي لأبها
طبعاً فيه الكثير من الاماكن الحلوه و المنتجعات و المزارع و المتاحف مااسعفني الوقت اروح لها ، اذا بحثتوا رح تلقون كثير اماكن حلوه بعد
هل ارشحها للزياره ؟ طبعاً ١٠٠٪ خصووووصاً بالصيف نبي نهرب من الحر عندنا ، بتكون اقرب و افضل مكان ، كثير مناظر أبهرتني هناك و أهلها يخشون قلبك سييييده 💕
الكثير يعيب عليها عدم نظافه بعض الاماكن او عدم الاهتمام بالسياحه فيها ، هنا رسالتي لرجال الأعمال اللي مهتمين يشتغلون بالسياحه ، ابها منطقه قويه للشغل فيها ، السياح كثير هناك ، حتى يوم اروح النماص السنه اللي فاتت كان فيه كثير خليجيين هناك ، فرصه عمل قويه هناك ، الرياض و جده امتلت مشاريع منتجعات ، وزعوا المشاريع هناك المنافسه قليل و الربح كثير باذن الله
اتمنى اني افدتكم و غطيت لكم اغلب الاماكن اللي رحت لها ، اذا عندكم اي استفسار أنا بالخدمه
