مرحلة النفاس الممتعه و المبهجه 💕

شفتوا العنوان ؟ 🤗💕

دايم استغرب من اللي مايحبون النفاس ، وينتظرون يتحررون من الاربعين يوم ، أو يقولون عن النافس مسكينه

بالعكس أشوفها من أجمل المراحل ، أول سبب يخليك سعيده أنك خلصتي الحمل و قرررت عينك بشوفة جنينك اخيراً ، بتقدرين تتأملين تفاصيله الصغيره بعيونك بدل ماكنتي تشعرين فيها داخل بطنك ، بتتأملينه كل ليله بدون شبع ، بتسمعين صوته و تشوفين ملامحه اخيراً .

أنتي بترجعين خفيفه ، مافيه ثقل ببطنك و ظهرك و حوضك و معدتك تحرروا من الضغط اللي فيهم ، بتقدريييين تنامين علي بطنك اخيراً 😆👏

و بتكونين خلصتي مرحلة الانتظار اللي طالت ٩ شهور ، و حان اللقاء بالجميل الصغير

بتكونين فزتي بمعركة الولاده و هديتك هي الأمومه اللي حصلتي عليها

كل هذه أسباب تخليك سعيده بالنفاس و تنسين التعب اللي يكون فيه

 

بالنسبه للنفسيه و التفكير /

وقت النفاس بسبب لخبطة الهرمونات الأنثى تكون معرضه للإكتئاب ، مو شرط لكن اذا حسيتي أنه بتجيك أفكار سلبيه أو مخاوف علطول طنشيها

و سككككري باب التفكير السلبي تماماً و علطول لفي على صغيرك الجميل تأمليه و تذكري زينة الحياة الدنيا اللي ربي وهبها لك و ابتسمي 💚

خليك مشغوله كل النفاس ، دايم بالنفاس يكون برنامجي حافل

اعملي لك جدول كل يوم عندك مهمه تعملينها

يوم عنايه جسم ، يوم شعر ، يوم تجهيز توزيعات للضيوف ، يوم يوجا و استرخاء ، يوم شاور البيبي ،، و هكذا

بعطيكم جدولي اللي عملته من قبل تاخذون فكره عنه

امسكي لك مسلسل و تابعيه دفعه وحده ، تقريباً أنتي فاضيه هالوقت و نومك حوسه مع الصغير فـ حلو تشغلين تفكيرك بأي شي

كذلك الروايات و الكتب مرره هذا وقتها و بتشغلك بعد

زيني الغرفه اللي بتقعدين فيها مع صغيرك بالستايل اللي تحبينه ، مفرش جديد و وسائد جديده و شموع

اعملي لك كورنر فيه ماء و اعشابك و غلايه أو ترمس ماء حار لأعشابك ، خوذي سله فيها سناكات صحيه تحبينها لجوع اخر الليل ( وقت النفاس دايم عطشانه و دايم جوعانه )

سوي لك جو جميل بغرفتك ترا له دور كبيييير بسعادتك وقت النفاس تحسين نفسك عروس 💕

اشتري لك مجموعة شاور و عنايه جديده بريحة مميزه تحبينها تذكرك بنفاسك بطلفك هذا

( أنا اشتريت هذه المجموعه لي من مزن منتجات طبيعيه وبدون كيماويات  , الصوره توديكم للرابط )

تجهيزك لملابس النفاس خليها جميله و دلع و تحبينه ، مثل تجهيزك لعرسك تشترين و تغيبينه لين تولدين و تتحمسين باللبس الجديد اللي بتلبسينه 👏

رسالة النفاس هي : صيري مشغووووله

 

العنايه الجماليه /

أول يوم : حمام مغربي

الحمام المغربي جددداً مهم وقت النفاس عشان تتخلصين من كميات الجلد الميت اللي مسكتها بشرتك خلال الحمل ، و كل مره بتلاحظين بلاوي تطلع من بشرتك حتى لو أنتي مداومه عالتقشير .

مجموعة الحمام المغربي اللي استخدمها حقت رؤى الطبيعه هي أفضل منتجات جربتها للحمام المغربي ، اضغطي هنا الرابط بيوديك لتدوينه الحمام المغربي

 

اليوم الثاني : زيت أو حمام زيت للشعر

هنا اقترح عليك ترطيب الشعر لأنه بيتعرض لشوي جفاف بعد البخار تبع الحمام المغربي ، أي زيت يضبط لشعرك

جوز الهند أو اللوز أو الجوجوبا أو الارغان ، موقع رؤى الطبيعه مليان زيوت حلوه و عصره أولى أنا معتمده عليها ، و عندك اي هيرب فيه كل انواع الزيوت ، كذلك العطارين

اليوم الثالث : ماسك وجه

اختاري الخلطة اللي تحبينها للوجه ، شوفان عسل زبادي ماء ورد الخلطات كثير اعملي اللي يناسب بشرتك ، أو استخدمي الماسكات الجاهزه اللي تحبينها من بودي شوب او سيفورا او غيره

اليوم الرابع : تقشير

طبعاً التفشير غير الحمام المغربي ، شي خفيف مارح يطلع لك كل الجلد الميت ، لكن بيحرك الدوره الدمويه و يقوي الجسم و اذا اخترتي مقشر بريحه حلوه رح تستمعين بريحة العطر اللي بتمسك بجسمك وقت طويل ( نبي ننسى مسألة نفاس يعني ريحتها اعشاب 😐)

اليوم الخامس : خلطة شعر

بعض الخلطات تقوي الشعر اكثر و تعمل تقشير لفروة الراس بالتالي شعرك بيستجيب للعنايه بشكل اكبر ، خلي خلطاتك فيها زبادي ( حمضية الزبادي تعمل تقشير لفروة الراس )

كذلك الكزبره و الجرير ممتازين لتنظيف فروة الراس ، السدر و الطين المغربي لتنظيف فروه الراس مره ينعشون الفروه و يقطعون القشره تماماً باذن الله

اليوم السادس و السابع راحه

طبعاً الشاور بشكل يومي ، نحرص يكون الماء دافي و نلبس علطول مانتعرض للهواء كثير ، و ماتنسين تتعطرين و المسك بأماكن النبض و عطرك اللي خصصتيه لوقت النفاس

 

التغذيه /

مسألة الأكل أبسط مما نتخيل ، أكل كامل القيمه الغذائيه ، حبوب كامله و خضار و فواكه و مكسرات و بذور، نحتاج ندخل مرق العظام مع نظامنا جدا مفيد

العسل الأسود و دبس التمر و السمنه العضويه كذلك لرفع التغذيه ، لازم نعرف انه جسمنا خسر الكثير من طاقته و قوته وقت الحمل و الودلاه عشان كذا نحتاج تغذيه قويه عشان نستعيد قوتنا

فيه متابعات طلبوا مني جدول لأكل النفاس لكن شخصياً ماسويت جدول و لا أحب الارتباط و التقيد بجدول أكل معين أحب التنويع و بشارككم الوجبات الممتازه لوقت النفاس كاقتراحات و انتو اعملو جدولكم اللي حابينه و خياراتكم ، بعض الوصفات موجوده بمدونتي اذا ماعرفتو تسوونها اكتبو اسمها بخانه البحث و تطلع لكم الوصفه

بالنسبه لوقت الأكل بيكون ملخبط لأنك كل ساعه او ساعتين بقومين عشان الصغير ، و طبعاً مارح يسمح لك تنامين وقت طويل فـ فجأه بتقومين تبين فطور و لا سناك و لا جوعانه تبين غداء ، عشان كذا افضل شي يكون أكلك مجهز من قبل أو مفرزن اذا يسمح أو مقاديره مثلا تكون مقطعه و جاهزه و انتي تكبينها على بعض بس ، اشوف أغلب الأجنبيات يجهزون وجباتهم من قبل الولاده بالفريزر عشان اذا ولدوا يكون اكلهم جاهز بالفريزر علطول مجرد تسخين بس ، هالحركه حلوه للمبتعثات و اللي بتنفس ببيتها و ماعندها احد يساعدها

 

 

الفطور :

شوفان مع العسل و المكسرات و الفواكه المجففه المطبوخ بحليب اللوز

توست اسمر مع جبنة كاجو و افوكادو و طماطم و نعناع

مفن جزر مع حليب لوز ساخن بالكاكاو

كوكيز زنجبيل بالشوفان ( أعمل منه كميه و احطه بعلبه جنبي اكله كلما بغيت )

عصيدة تمر فوقها عسل اسود و دبس تمر

أي نوع بانكيك صحي بالمدونه وصفات كثير له ( أسوي منه كميه و احطه بالفريزر و اطلعه لما ابي فطور سريع )

( شوفي كتابي 100 بداية صحيه كله خيارات فطور صحيه مناسبه لك ولعائلتك )

 

عشاء أو غداء /

رز اسمر اي نوع مرق ( خضار – قرع – لحم او عظام – فاصوليا – حمص)

مرقوق او قبوط او مراصيع مع الكثير من الخضار

مكرونه حنطه أو قمح كامل مع صلصة طماطم أو كريمة كاجو

برجر نباتي من البقول أو لحم بقري عضوي صافي ( أعلى اللحوم جوده هي الأوروبيه و النيوزيلنديه غالبا تصير مرعى حر و ذبح حلال )

خضار مشويه

مجدرة برغل و عدس

شوربات ( عدس – ماش – خضار – بروكلي – حريره ) < دايم احب الشوربه كـ عشاء مع كم قطعة خبز قمح كامل

هذا اللي ببالي حاليا مخي فقل نسيت وش كنت اكل 😄 بس المهم حبوب كامله ، الرز كامل و الحبوب كامله و القمح اسمر  وهكذا

 

السناكات /

و أشوفها أهم فقره ، لأنك طول الوقت بتجوعين جسمك محتاااج طاقه لأنه خسر الكثير ، و مع الرضاعه تحتاجين كالوريز اكثر

جهزي سناكاتك الصحيه مسبقا عشان ماتخربطين بعدين ، و بهذا الفديو سناك جدا مفيد لوقت النفاس مره حلو اخر اللي مع كوب اعشابك

مقاديره : معجون تمر – زبدة فول سوداني – بذور شيا – حبوب رشاد – شوفان – زبدة أو سمنه اذا حابين ، تكور و تغلف بالقرفه

بار التمر والشيا

الجوانولا بار

كرات الطاقه

كوكيز الزنجبيل

 

وبالنسبه لتجهيز الوجبات مسبقاً شوفوا هذه المدونتين فيهم وصفات لاكلات تتجهز و تتفرزن مسبقاً ( اضغطوا عالصوره يوديكم للرابط )

 

 

 

أعشاب النفاس و المكملات /

أول شي نفكر فيه اذا قلنا نفاس ” أعشاب ” ، و أكثر موضوع يضيعون البنات فيه ، إيش الأعشاب اللي اخذها للنفاس

it’s not a BIG deal  الموضوع بسيط جداً 

أحد أهم الأعشاب اللي لازم توفرها النافس هي قشر القهوه أفضل شي على نصيحه الدكتور جابر القحطاني و لو اكتفيتي فيها عادي

اعملي لك ترمس قشر قهوه و اشربيه طول الوقت

طريقتي فيه اني احمسه شووي و أطحنه اضيف له قرفه أحبه كذا و أخففه و اشربه مثل شاي الاعشاب ملعقه منه على كوب ماء مغلي

فيه ناس يضيفون له بهارات مثل بهارات القهوه هيل و زنجبيل و قرنفل و زعفران و يشربونه ثقيل مثل القهوه ، لك الحربه بالطريقه اللي تحبينها

موجود عند العطارين

و الاعشاب الحاره اللي تمشي الدم اسرع مثل القرفه و الزنجبيل تساعدك تطهرين اسرع ، خصوصا اذا وقف الدم فجأه اشربيه و يرجع ينزله

كذلك ممكن تعملين خلطه ( يانسون و كمون و شمر ) و تشربينه بين وقت ووقت لما تحسين بطنك منزعج او عندك غازات

الحلبه هي ملكة الاعشاب و أكثر شي مغذي و مدر قوي جددداً للحليب ممتاز اذا حسيتي حليبك مو كافي

الحلبه القصيميه هي الأقوى فائده و الأقوى ريحه

يجي بعدها بالفائده الحلبه اليمنيه ، ماتطلع منها ريحه قويه ، و أنتي بتاخذين شاور كل يوم و تتعطرين زي مااتفقنا فـ ماتخافين من موضوع ريحة الاعشاب اللي ممكن تطلع منك

طبعاً الحلبه خيار جدا جميل لتقوية الجسم ، مثل ماقلنا خيار ، لك الحريه بأخذه أو الإستغناء عنه

بالنسبه للمكملات استمريت على مكمل الحمل حقي ، شخصياً ناسبني لكن البعض ماناسبهم و سبب لهم مشاكل بالمعده ، انتي اختاري الشي اللي يريحك ( اضغطي عالصوره يوديك للرابط )

ممكن تاخذين مكمل بهالشكل تخلطينه مع السموثي

 

الرياضه /

على كثر ماكنت احرّص عالرياضه وقت الحمل ، الحين أحرصكم على الرااااحه

جسمك تعرض لأكبر معجزه بالكون و هي الولاده ، عمليه مو هينه عليه ، تحتاجين الراااحه عشان تستعيدين قوتك ، أول ٢٠ يوم لا تسوين و لا شي 🙌 سمعتيني و لا شي 😄 مشي خفيف معليش لتحريك الدوره الدمويه ، بس لااا تجهدين نفسك عشان ماتتأخر العافيه عليك ، أقول هالكلام من خلال بحثي و سؤالي لأهل الخبره و جمعي للمعلومات و تجربتي كذلك ، الحين عضلات بطنك منفصله من بعد الحمل ، اذا عملتي عليها اي جهد رياضي الحين رح يزيد الانفصال و مايتعدل ( مثل اللي صاير لي الحين بسبب حماسي بالرياضه وقت النفاس بأول حمل )

دايم نفكر بالأجنبيات نقول علطول يتحركون من ثاني يوم ،، بس لقيت أنه حتى عندهم هالشي مستنكر و أخصائيينهم بعد يقولون هالشي غلط

فـ الرياضه أول ٢٠ يوم ممنوع ، مشي و حركه خفيفه مو إجهاد

بعدها تبدين كارديو عالخفيف بدون اجهاد ، و امشي مع مدربه شاطره و فاهمه بالرياضه مثل روبي تمشي معك خطوه بخطوه بشكل سليم

لااا تستعجلين على استعادة جسمك مثل ماكان قبل الحمل ، اعرفي أنه جسمك مر بالكثير خلال الـ ٩ شهور ، فـ من المنطقي تعطينه مهله نفس هالوقت عشان يرجع لطبيعته

 

 

هذا كل اللي ببالي بخصوص النفاس ، أهم الأشياء اللي تركزين عليها مثل ماقلنا : كوني مشغوله ، اقعدي مع الناس لا تصيري لحالك ، ارتاحي و انسدحي أول الوقت لا تجهدين نفسك ، أدري بتفرحين بكونك خفيفه و تركضين و تقفزين بكل مكان 😂 بس ترا جسمك لازال مجهد و تعبان و بتشوفين التعب بعدين عشان كذا لا تضغطين على نفسك العافيه بتجي مع الوقت ، الحين اهتمي بتغذيتك و تغذية الصغير و بتستعيدين قوتك مع الوقت و الراحه ، لا تفكرين بشكل جسمك و وزنك كثير ، كل شي بتستعيدينه مع الوقت لا تخافين

أتمنى لك كل الصحه و العافيه و السعاده مع صغيرك الجميل 🌹

أتمنى اني قدرت اغطي أكثر الجوانب بالنفاس ، إذا عندكم اي سؤال تفضلوا رح أجاوبكم باللي اعرف 🌹