العنوان على وزن مسلسل يوميات زوجه مخروشه أوي 😛

طبعاً للأبد نوره مخروشه مع البيت و الأطفال ، هالمره مع معجزه صغيره داخل بطنها يارب يتممه على خير 

بطبيعة الوحده اذا حملت تصير دراما حبتين ، حساسه و تنظر للأمور بأكبر من حجمها ، اكثر شي يريحها انها تفضفض ،، حبيت يكون هالبوست مساحه لي ، و يكون مرجع لتجاربي إذا حبت أي حامل تستفيد منه 🌹

طبعاً هذا ثالث حمل لي ، و يمكن اول حمل احمله و انا ناضجه اكثر و واعيه اكثر ،، قبل كنت صغيره كثير بعمر ١٩ و ٢١ 

و الحلو انه هذا اول حمل اكون منتظرته و متشوقه له و لكل مرحله فيه ، و أمومتي طلعت اكثر ،، عندي امل انه هذا الحمل بكون متفائله فيه اكثر و بحاول استمتع بكل لحظه فيه ، يارب أقدر ☹️

 

الشهر الأول / 

كنت احس اني مو طبيعيه ، من اول يوم ،، مشاعري متضاربه و بس افكر ، شهيتي مفتوحه للأكل و الوجبه اكلها دبل و قولوني علطول متهيج سواء اكلت شي او مااكلت شي يحسسه 

تجيني دوخه بسرعه و علطول ضغطي نازل ، كنت احس أنه فيه شي لكن قاعده اتجاهل الوضع 

حللت بالبيت ، طلعت النتيجه سلبيه قلت مشاكل قولون بس خلني اشرب اعشابي و علاجاتي و احرص على اكلي اكثر 

مر اسبوعين ، العاده تأخرت ، هنا حللت بالبيت و طلعت ايجابيه 👼

المشاعر اللي جتني مثل اي خبر حمل يجيني من قبل ، فرحه يكسرها خوف من المستقبل ، من صعوبات الحمل و من صعوبات الولاده و التربيه و غيرها ، الحين المسؤوليه بتزيد و التعب بيزيد ، لكن سبحان الله مانقدر ألا أننا نحبهم ، زينة الحياة الدنيا ماشاء الله تبارك الله 💕

مااستعجلت عالمستشفى ، اتخذت نمط غذائي جديد مناسب للحامل ، الكثير من البقول كمصادر للفوليك ، الكثير من الخضار ، اكون نباتيه تماماً ” هو النظام الأسلم للحمل ” 

و كنت مستمره على رياضة المقاومه ، حاولت اكمل لكن صارت تجيني تقلصات و دوخه تخليني مااقدر اكمل ، فـ قررت اسمع لجسمي و استمر على اليوجا المناسبه للحمل 

 

 

 

الشهر الثاني /

بدا الوحام 💔💔

طبعاً وحامي شرير جدا جدا ، جدا 

اصير هيكل عظمي لاأكل و اا شرب فقط مغذي و ادويه تخفف الوحام ، كان عندي امل هذا الحمل بما اني على النظام الصحي من وقت ، يمكن الوحام يخف او مايجيني مثل قبل ، لكن للأسف ماتغير

تجيني متلازمة القيئ المتواصل ،، ماأصحصح الا بعد ابرة الفولتارين حقت الغثيان ، بعدها ابدا اصحصح و اكل قد مااقدر ، اخزن لباقي الايام الجايه 

طبعاً بهالشهر صعب جدا اضبط اكلي ، هذا اذا اكلت ، لكني احاول قد مااقدر اكل لو لقمه من اي نوع من الفواكه و الخضار ، اشرب عصيرات فريش قد مااقدر 

اكل الاشياء المقرمشه مثل الخيار و الخس ، انعش نفسي ببطيخ او خوخه بارده 

فيه حركه ريحتني كثير و هو اني اقطع خوخ صغير ، و احطه بقوالب الايس كريم و اصب عليها ماء جوز هند و احطها بالفريزر ، ايس كريم سريع و منعععش ، لاحظت الاشياء البارده تريح بطني كثير 

أتمنى بس هالشهر يعدي عشان ارجع للأكل و اقدر انتبه لصحتي و رياضتي 

شي مزعج اني احس وراي مسؤوليات و شغل و زوج و اطفال اشوفهم محتاجيني و انا مااقدر اسوي لهم شي غير اني انتافض عالسرير من التعب ☹️? 

فيه اشياء ساعدتني عالسيطره على الوحام شوي ( اضغطي عالصوره يوديك للمنتج )

هذه الاسواره اخذتها من اي هيرب ، مستوحاة من الطب الصيني اللي هو الوخز بالابر ، لكنه ابسط ، فيه خزره تضغط على عصب معين يخفف لك الغثيان ، مكتوب انه يستخدم للمسافرين بالطياره و الوحام و اللي ياكلون ادويه تسبب غثيان 

ريحني كثير و خلاني اقدر اسيطر على الغثيان خصوصا اذا كنت طالعه برا ، يمكن خفف الغثيان بنسبه ٤٠٪‏ 

 

هذه الحلاوة هي اللي تخليني اقدر اقوم من النوم ، اول ماافتح عيني اكل منها و اذا طلعت بالسياره اكلها ،، فكرتها انها تشغلك عن التفكير بالغثيان ،، طعمها حلو جدا و مكوناتها طبيعيه ، بالبدايه كانت تساعدني كثير بعدين صارت ماتجيب نتيجه ، او يمكن طفشت من طعمها 🙄

كذلك احط بالفواحه روائح عطريه تخفف لي الشعور بالوحام ، الروائح الحمضيه مثل الليمون و البرتقال ، كذلك العشبيه مثل الصنوبر و اكليل الجبل تريح كثير خصوصا للغثيان 

 

 

 

 

الشهر الثالث /

هالشهر كان أصعب شهر بالنسبه لي ، طول الوحام الشديد معي و بديت أيأس و أطفش ، لين ماقررت التداوي بسورة البقره 💕 الحمدلله رجعت لي روحي و صرت أتقوى فيها ، كنت فقط محتاجه أمل و صبر ، و هالشي مايجي من غير ربي سبحانه الكريم 💕

الغثيان و الترجيع يزيد و ينقص ، لكن موجود ، صراحه هذا اكثر حمل اتعب فيه من الوحام ، كنت اتعب بالحمل اللي فات لكن كان يمسك معي اسبوع او اسبوعين و يوقف خلاص و اكمل اعيش حياتي ، هذا الحمل كان شهرين متواصلات متوقفه عن ممارسة الحياة بشكل طبيعي و التفكير و الاكل بشكل طبيعي ، ياربي لك الحمد أن شاء الله كله بأجره

الحين رجعت أكتب و أنا بالأسبوع الاخير من الشهر الثالث ، و اخيرا بدا يخف ، و بديت ارجع أكل و أرجع للرياضه و نمطي الصحي السابق ” اشتقت لنفسي 😔”

الحين صرت أحاول أدخل اكبر قدر من الفيتايمنات لجسمي ، خصوصا بعد ماقفدت الكثير خلال فترة الوحام و بديت احس بأعراض فقر الدم من ضعف اظافر و تساقط شعر و دوخه و غيره

العسل الأسود و الشمندر و الجرجيرو السبانخ و الرمان و الكينوا و الشوفان من الأشياء اللي احرص ادخلها بيومي

كل يوم اشرب سموثي ، اكل حصة من البقول ” فول حمص ، فاصوليا ” ، أكل خضار بجميع اشكالها المطبوخه و النيئه ، قاعده احاول اقلل زيوت و سكريات قدر الإمكان ” حتى الصحي منها ”

ضروري أكون صارمه بنظامي خلال الحمل ، لسلامة جسمي و سلامة جنيني ، نبي نحارب بهذه الحياة عشان مانخسر صحتنا و نمر بحمل مريح و ولاده سهله بإذن ربي

 

الشهر الرابع /

الحمدلله دخلت بشهور الحمل الجميله ، الحين نقدر نقول أننا نبي نستمتع بالحمل و نحس بكل الجمال اللي فيه ،، ههههه ان شاء الله مارح اطفشكم حلطمه هالشهرين خلصنا وحام الحمدلله و بدينا بأجمل شهرين

الحامل أجمل و احلى و أخف شهر بالنسبه لها هو الشهر الرابع و الخامس ،، مافيه مشاكل حمل من ثقل ووحام و حموضه و انزعاج بالنوم ، فقط كرشه صغيره ماتدرين تخفينها و لا تبينيها 😅

سويت لي برنامج تغذوي مبسط حرصت يكون فيه اكثر كمية فيتامينات ، جهزت لي وجباتي و سناكاتي عشان ماأتكاسل آكل شي مفيد أو أضطر أني اروح للمضر الجاهز

بعطيكم مثال للجدول اللي سويته ، من مبدأ أني أشارككم مو عشانه هو المثالي و الصح و اللي لازم كل الحوامل يسوونه ، بس أعطيكم إلهام للي ممكن تسوونه حسب احتياجكم و المقادير المتوفره عندكم و اللي تحبونه

أنا من قبل الحمل كانت سعراتي عاليه على قد احتياجي ، عشان كذا أفطر دفعتين و اتغدا دفعتين

الفطور /

عصير جزر – بورديج شوفان مع ملعقة عسل اسود ( مليان حديد )

فول + خبز شعير + بعض النواشف + شاي الحمل

الغداء /

رز اسمر + أي نوع ايدام مثل ايدام عدس او باميه أو خضار

سلطة كينوا

سناك /

جزر + خيار + نوع فاكهه + حمص

العشاء /

بطاطس مسلوق + حمص + أفوكادو

سموثي شمندر

هذا مثل وارد جدا يتغير بس حبيت اشارككم ياه

مثل ماتلاحظون الأكل كثير لكن سعراته قليله و مليان فيتامينات و ما فيه زيوت و سكريات و هذا المهم للحاملو الكميات حسب وزنك و حاجتك

الرياضه مههههمه جدا وقت الحمل ، بعكس الموروثات اللي سمعناها من الأولين ، الحامل ترتاح ، تنسدح ، ماتشتغل ، ماتتحرك كثير

الأصل هو العكس تماااااااامااااااا ✋

اذا حملك سليم و مافيه مشاكل تسقيط او نزيف ، اشكري ربك و لا تقعدين ، تحرررركي قد ماتقدرين ، اعملي الرياضه المخصصه للحمل اللي تقوي لك الظهر ” العمود اللي بيشيل لك الجنين كل الأشهر القادمه بإذن الله ” و الأفخاذ و البطن ، كل عضله بالجسم تحتاجين تكون قويه عشان تشيل المعجزه الصغيره اللي بطنك و تكون عندك قاعده و عضلات قويه مستعده للولاده لأنها عمليه صعبه جدا تحتاجين تتقوين لها كل فترة الحمل ، بنات الرياضه شي مهم جدا خلال الحمل و من قبله عشان نقدر نمر بحمل جميل و مريح بإذن الله

و هذه تمارين جميله جدا لتقويه الحوض و الظهر خلال الحمل ، سويها شوي شوي و بين كل تمرين و تمرين اوقات راحه

شي ثاني قاعده احاول احرص عليه هو

شرب الماء

نخلي قارورة الماء علطول بيدنا و قدامنا ، بالصاله بالمطبخ بالمكتب كلما تذكرنا نشرب ماء و مايحتاج نذكر فوائده الكل صار حافظها ?
ممكن تكون سر صحه اي شيء بالجسم ، حتى لو ماتحبين الماء تقدرين تسوينه ماء ديتوكس او باختصار ، عودي نفسك ، مثل ماتعودتي على قل الماء تعودي على شربه

الشهر الخامس /

توني داخله الشهر الخامس و بدت الدوخه و الانزعاج وقت النوم و من الجلسه الطويله من الحين ، كل حمل يختلف عن الحمل الاخر مستحيل يصير حملتين نفس الظروف ، حملي السابق كان الثقل هذا يجيني بالسادس

طبعا الدوخه من الوقفه الطويله غالبا ، بعض الحوامل تجيهم بعض الحوامل لا ، ممكن يكون سببها نزول الضغط ( بطبيعة الحامل دايم ضغطها يكون نازل ) او نزول سكر

اذا جتك هذه الدوخه علطول ارتاحي و انسدحي و مدي رجولك و اشربي ماء ، دقايق و تروح باذن الله

احس معدتي صايره حساسه من اشياء غريبه مثل الحليب و القهوه تتعب قولوني ،، قاعده اشارككم هالتفاصيل عشان ابين لكم انه طبيعي الحامل تحس باختلاف او شي غريب فيها ، تغيرات فيزيائيه و كيميائيه و هرمونيه قاعده تمرين فيها طبيعي تحسين باعراض غريبه مثل كذا

الاعراض اللي مانتجاهلها شوفوها هنا من موقع بيبي ينتر ارابيا هو مرجعي الجميل لكل مراحل الحمل

الحين يبدا شغب الجنين شوي و ترفيساته اللطيفه بسم الله ماشاء الله 😊 يبدا التواصل يكون حقيقي بينك و بين الروح اللي داخلك

نحتاج نكثر مصادر البروتين و الحديد و النحاس و الزنك ، عشان الدم اللي بيصير يروح للجنين بشكل اكبر من قبل الحين

جنينك كل يوم بيكبر و يخلق فيه شي جديد سبحان ربي ، عشان كذا مانقصر فيه من ناحية الفيتامينات و الاكل ، ابدا لا تفكرين بوزنك بالحمل و تجوعين نفسك مو وقته الحين بعد الحمل كل شي بيتعدل ، فكري بدمك بس و جودة اكلك

المكملات اللي كل يوم أنسأل عنها ، اممم لحد الأن مااخذت شي و لا جربته عشان كذا مااقدر افتي بهالشي الحين

قاعده احاول اكثر مصادر فيتامينات طبيعيه من الاكل قد مااقدر ، و مؤمنه جدا أنه ربي خلق الكمال بالغذاء اللي خلقه للبشر بدون الحاجه للمكملات ، هذا رأيي الشخصي اللي احب انا امشي عليه أما اذا بنصح ، بقول استشيري طبيبتك بعد التحليل و الفحص هي اللي بتعرف اذا بتحتاتجين او لا

الشي اللي ضروري نحرص عليه بالحمل هو 

دللللللللعي نفسسسسك ، أنتي تستحقين الراحه و النقاهه لا تبخلين على نفسك بجلسة بديكير و لا تجديد ستايل بالصالون و لا مجموعة جسم عطريه جديده مع بجامه كيوت و لا بانيو ساخن مع املاح عطريه ( جدا ممتازه للحمل لكن لا تقعدين اكثر من ٢٠ دقيقه بالبانيو )

طلعه مع الناس اللي تحبينهم ، كوب قهوه عالبحر ، كوب شاي اعشاب مع كتاب ، اي نوع من انواع الرفاهيه سويه لنفسك لا تتعذرين بالزوج و الاطفال انتي تقدرين و تستحقين هذا

لأنك أنسانه عظيمه و شايله معجزه ببطنك و بتسوين اقوى مهمه بهذه البشريه و هي الأمومه ، لا بتخلين على نفسك بمكافآه صغيره بأي شكل تحبينه و تقدرين عليه

الحامل نفسيتها تتقلب كثير و تصير حساسه زياده و عرضة للإكتئاب ، لا تنتظرين الإكتئاب يجيك من الهم و التفكير اهربي منه و دلعي نفسك ، وصية هذا الشهر : دللي نفسك 💆

خصوصا انك بعد الحمل مافيه مجال تهربين لنفسك بيكون فيه طفل و سهر و ترضيع و اهتمام ، شوفي ذاتك الحين بعدين مافيه وقت

 

 

الشهر السادس /

و بدينا مرحلة الحموضه الزايده و ضيق التنفس ، الصغير النقطه بدا يكبر شوي و يضغط على الأعضاء اللي فوق 😁

الحموضه طبيعيه جدا بالحمل و مالها علاج جذري تماما لكن لها بعض الحلول اللي تخففه

تجي الحموضه بسبب هرمونات الحمل و ضغط الجنين على المعده

الحل هو : ماتاكلين كميه كبيره دفعه وحده ، صرت اخلي وجباتي على دفعتين حتى لو ماشبعت تماماً ، آكل صحن الحين و بعد ٢٠ دقيقه اكل صحن ثاني ، فطوري مثلا أول شي ابدا بسموثي بس و بعد ربع ساعه اكل وجبه الفطور ، و هكذا

العشاء اكثر شي اهتمي فيه انه يكون خفيف و مافيه اكلات تهيج الحموضه مثل البهارات و اللحوم و الحليب

الخيار و اللوز او حليب اللوز و منقوع اللبان و خل التفاح المخفف من اجمل مهدئات الحموضه اللي جربتها

صرت كل يوم قبل النوم اشرب حليب لوز يساعدني انام بدون ازعاج الحموضه

و الماء اللي جنب سريري ناقعه فيه لبان عشان اذا قومتني الحموضه من النوم اشرب منه علطول ( أكثر شي تتهيج وقت النوم )

الحين حركة الجنين صارت اوضح و أنشط ، اتوقع الشهر السادس و السابع تكون حركته نشيطه و يكون مرتاح بهالشكل لكن بعدين بيكبر و يضيق الرحم عليه و تصير الحركه اثقل

الحين الحاجه للأكل اكبد من قبل ، ضروري نرفع سعراتنا من ٢٠٠ لـ ٤٠٠ سعره ، و نكثر مصادر فيتامينات لأن الجنين كبر و صار يحتاج مغذيات اكثر

يعني الكثر من الخضار و الفواكه و الحبوب الكامله و البقول

أحب أخلي سناكاتي الصحيه جاهزه عندي علطول بحيث اذا صار و قت القهوه “شعير طبعا” أكل معاه حلا #يغذي-ما-يأذي ،، مثل كرات الطاقه البروتينيه و الواح الطاقه ، أو الجرانولا بار ، اذا ماسويتها من قبل اسهل حل ” تمر مع طحينه سمسم و عسل اسود ” مصدر بوتاسيوم و كالسيوم و مغنيسيوم و حديد و الكثير من الفيتامينات

صديقتي الصدوقه خلال الحمل هي زبدة الشيا ( أضغطوا عالصوره يوديكم لرابطها كود الخصم ٢٠٪ : NON15  )

أحسن زبدة شيا جربتها للآن و خلصتها و بطلب ثانيه و ثالثه و رابعه بستمر عليها لبعد الحمل عشان التخلص من التشققات اللي بدت تطل شوي

شوفوا موضوعي حق العنايه بالبشره و التخلص من التشققات

النفسيه ؟

ماأدري اذا كنت حساسه زياده عن اللزوم أو عصبيه زياده عن اللزوم ، لكن يبين بعد الحمل بقول اوو شقد كنت حساسه و نفسيه 😅😅

قاعده احاول قد ماأقدر ابعد عن أي شي يوترني علطول اكنسله ، ناس مقابلهم يجيب لي توتر و ازعاج تركت جليتهم ” عالاقل خلال الحمل عشان اعرف اني مارح اسيطر على مشاعري كويس ” أماكن مزعجه و تجيب لي التوتر ماصرت اروح لها ” بناتي لين اليوم يبون يروحون تشاكي تشيز و انا ارفض 😄💔”

أول ماأحس نفست علطول ادخل غرفتي و اشغل شموعي و احط من العطور و الروايح اللي احبها و أحاول اخذ شهيييييق ، أخذ شاور دافي أعبي البانيو و احط املاحي ، ألبس البجامه اللي احبها و اقعد أقرا كتاب

أسوي شاي شمر ” كويس للحمل ” أو شاي ورق التوت و اقعد تحت ضوء الأبجوره

هذه الأشياء اللي ألملم فيها نفسيتي و أنا بالبيت ، إذا قدرت اطلع طلعت مشيت شوي أو طلبت عصير جزر و اقعد ادور بالمجمع ” أدور ، أمشي ، أتحرك ” المشي افضل من الجلسه

و لاتقولين مافيه احد يدلعني ، الظروف الاطفال الزوج الوظيفه الناس ، هذه اعذار باليه ، هالشي يجي منك انتي اذا قررتي أنك بالمقدمه و انك تدللين نفسك محد بيقدر يمنعك ، و لاااا تنتظرين من احد يطالع لك و يدلعك هالسي منك و لك أنتي فقط

ضروري نهتم بنفسيتنا خلال الحمل أكثر من غيره ، نبي حمل مريح نفسيا و نبي نستمتع بكل مرحله فيه مانبي نخرب على أنفسنا ، اذا استسلمتي للنكد بتتنكدين كل حملك و تقولين : اف متى اخلص منه بس ، و اذا سيطت عليك هذه الافكار صدقيني بتطول الولاده و يتصعب عليك 😅

الرياضه

أخ من الرياضه و ماأدراك ما الرياضه ، لقوة الجسم ، سرعه استعادة الوزن بعد الحمل ، النفسيييييه العسل تفرغ كل سلبيتك

ارجع أأكد عليها ، أحنا نبي جسسسسسم قوووي بنات الحمل مايمشي بسهوله على جسم ضعيف و عضلات مهلكه ، الحمل مو شي سهل يمر عليك لازم تعدين له جسم قوي يشيله

بالشهر السادس و بعده ، او لما يبدا يثقل الجنين تصير أفضل رياضه بالنسبه لك هي السباحه ، او الرياضه تحت الماء ، جدددداً جميله

لأنك تحت الماء فـ الماء بيرفع لك وزن الجنين عن الأربطه و الحوض و بتصيرين تتحركين اسهل و تقدرين تمرنين عضلاتك اسهل

و ظهرك بيرتاح وقتها لأن الماء رافع لك وزن الجنين عنه

إذا حولك نادي فيه مسبح لاااا تترددين انك تسجلين فيه صدقيني مااارح تندمين 👍

اليوجا كذلك جدا ممتازه ابحثس عنها عن تقنيات التنفس بيوتيوب ، تساعد انه عضلاتك تكون مرنه و اكثر و الحوض يتوسع اكثر استعداداً للولاده و الاكسجين يدخل جسمك اكثر

مع الرياضه حملك بيصير اسهل ، أخف ، نفسيتك افضل ، حتى ولادتك بتكون اسهل و اقصر بإذن الله

 

 

الشهر السابع /

عنوان هذا الشهر : حموضه + حمام ” تكرمون” 😅

هذه اكثر المشاكل البارزه خلال هذا الشهر، و تطرقت لبعض حلول الحموضه بالشهر اللي فات ، بس يمكن مفعولها يكون اقل هذا الشهر و الشهر اللي فات

هالتعب هذا للي بيخلينا نحب أبناءنا أكثر صح ؟ 🙃

الحين يمكن يمكن تبدا تقلصات براكستون هيكتس او الطلوق الكذابه مثل مانقولها

ماتكون طلق طلق ، لكن شوية تقلصات اسفل البطن و الظهر ، الحين بيجي دور بخاخ المغنيسيوم ” الرابط بالصوره “

بيهدي الشد و الآلام ،، استشيري طبيبتك قبل ماتستخدمينه

كذلك املاح البانيو قاعده استخدم هذا النوع جميل جدا لتسكين الالام بشكل عام خصوصا الظهر تبدا الآربطه الحين ترتخي اكثر و تضعف فالعلاجات من هذا النوع تريح كثير

طبعاً رشحت هذه المنتجات لأني جربتها يمكن فيه احسن منها ماادري تقدرون تستخدمون اللي تحبون بس نفس الفكره

المفروض الحين اكثر تمارين التنفس + توسيع قاع الحوض + مشي

و بديت ببرنامج الثلث الاخير من الحمل

شاي الثلث الاخير من الحمل :

و شاي ورق التوت

هالشواهي ممتازه لتسهيل الولاده و لحمل سليم بشكل عام ، انصح فيها جدا جميله

الحين النوم يصير صعب حبتين ، بين حركة الجنين و البحث عن الوضعيه المريحه لك و لكرشك 😅 أيضاً الحموضه اللي اذا عرفت انك بتنامين اشتبت 😷

فـ لا تضغطين على نفسك بالنوم نامي اي وقت تقدرين تنامين فيه عصر ظهر مغرب ، اصلا بعد الولاده نومك بيتلخبط بعد فـ لا تضغطين على نفسك بتوقيت النوم نامي متى ماقدرتي

الحين جاء دور البحث و القراءه اكثر بخصوص عملية الولاده و الاحتياطات اللي لازم نسويها قبل الولاده و خلالها

حضرت مؤخرا هذا الكلاس جدددا فادني و عطاني معلومات جديده علي مع اني سبق ولدت  ” بالانجليزي مافيه ترجمه للاسف و مالقيت محتوى عربي فيه نفس هالكم من المعلومات ، له اجزاء انصحكم تشوفونها كلها “

و هذه البنت حبيت كلامها كثير بخصوص كيف تسترخين وقت الولاده

عموما لكل اللي تخاف من الولاده ، إيش قاعده الخوف ؟ هو المجهول

خوفنا دايم مش من نفس العمليه ، الخوف يكمن بأننا ماندري ايش بيصير ، اذا عرفنا كل تفصيل بيصير خلال الولاده و كيف جسمك بيشتغل خلال الولاده وقتها بتتطمنين لأنك عارفه ايش بيصير

لاتوقفين عن القراءه و البحث عن الولاده كلما عرفتي اكثر كلما راح الخوف اكثر

خصوصا انه الخوف بيصعب الولاده علمياً ، المشغّل بعملية الطلق و الولاده كلها هرمونات ، فـ خوفك بيخلي الطلق يطول و اكثر ايلام و البيبي بصعوبه رح يطلع ، عشان كذا نبي نتدرب عالتنفس و الهدوء و نهيئ نفسنا لكل اللي بيصير بإيجابيه و راحه

هالشهر بنكون مشغولين بتجهيزات البيبي و النفاس

بسولف لكم عن تجهيزاتي بتدوينة ثانيه ان شاء الله

الشهر الثامن /

بدينا نطفش شوي من الحمل مو ؟ 😅 يبدا الثقل و الاعراض المزعجه تزيد مثل الحرقان و كثره التردد عالحمام و صعوبة الهضم و صعوبة النوم ، و تصير حركة البيبي عنيفه شوي علينا ” بس ممتعه و نحبها كثر ” 😊💕 خصوصا لما نشارك اللي نحب و نخليهم يحطون يدهم على بطنك و يحسون بالركلات المشاغبهو تشوفين ردات فعلهم الطريفه ، اللي تدمع عينه ، اللي يخاف ، اللي يقعد منبهر و متعجب من عظمة الخالق ، و اللي يتقرف 😂

الجنين بيضغط عالمعده ، فـ طبيعي الحرقه و مشاكل الهضم ، كلها شهر و ينزل عالحوض و ترجع تتنفس المعده ، نحتاج نقسم وجباتنا ، صرت اذا اكلت وجبتي اكلها على دفعتين ، نص الصحن اكله و اخلي النص الثاني بعد نص ساعه مثلا و هكذا

كذلك بيكون فيه ضغط عالمثانه فـ كثره الذهاب للحمام طبيعيه ، اغلب اللي حملوا من قبل عارفين هالشي بس هالمعلومات للمامات الجديدات ، اذكر كيف اول حمل وسوست انه فيني سكر و طلع طبيعي الوضع 😅

بهالشهر حاجتنا للحركه و المشي اكثرلكن بدون ماتضغطين على نفسك لأن اربطة الظهر رح ترتخي و تضعف فـ مانبي نتعبها ، السباااااحه افضل شي جربته رااااحه ، حتى اذا ألمني ظهري بس اروح اسبح بالنادي علطول يطيب الحمدلله لأن مثل ماقلت قبل الماء يرفع ضغط الجنين عن ظهري

ايش بعد ايش بعد

ايه

الحين الدم وارد جدا ينقص ، اعملي تحليلك و تأكدي انه تمام ، نحتاج نكثر مصادر حديد و بروتين

كل يوم صباح اشرب منقوع التين و الزبيب الاسود و القراصيا ، انقعهم طول الليل و الصباح اضيف له عسل اسود و شوية قرفه للطعم و ماء ورد ، عالخلاط ، مايأثرون عالحمل خصوصا بالثلب الاخير لا تخافين من شي بإذن الله

كذلك السموثي اليومي اللي اسويه :

شمندر – كيل – موز – حليب لوز – فراوله – شوفان – سبانخ

هذه الاضافات اللي اضفتها لروتين اكلي اليومي مع الوجبات الكامله من حبوب كامله و بقول و خضار و فواكه

المهم أنك تحتاجيييين غذاء و فيتامينات ، احشي نفسك فيتامينات قد ماتقدرين

فـ نصيحة هذا الشهر :

الأكل المغذي

كولي من مصادر الفيتامينات قد ماتقدرين

لا تقولين اخاف من سمنه ، محد قال لك كولي دهن و سكر ، نبي فايتامينز بس من خضار و فواكه و حبوب و بقول ، كل اللي بتاكلينه بيروح للمعجزه اللي قاعده تكبر داخلك

و من رأيي ماأشوف أنه الحمل هو الوقت المناسب للتفكير بالوزن ، كل اللي بتكتسبينه بيرجع بإذن الله سمنة الحمل ماتخوف حبتين رياضه بعد الولاده و امورك تمام باذن الله

 

 

 

الشهر التاسع /

 

أقدر أقول عنوان هذا الشهر هو

إنتظار

كل يوم يمر عن شهر مر من قبل ، أطول شهر في الحمل هو هذا الشهر ، قرب لقاء الملاك الصغير ، و صار كل يوم يزيد الشوق اكثر ، و مع كل حركه داخلك تقولين متى أشوف حركات هذا الصغير بعيوني قدامي بدل مااحس فيها بشكل مبهم داخلي ، آه مشاعر عجيبه ، مااعرف اذا هي جميله او محزنه ، لكن اللي اعرفه اني رح اتذكرها و أنا ابتسم بالمستقبل

التنفس الحين صار احسن و الحموضه المفروض خفت لآن الجنين نزل للحوض و صار فيه مساحه اكبر للرئه و المعده ، لكن زيارات الحمام رح تكثر لازم يصير عندنا قبول لهالشي 😅

طبعا مايجي هالشهر ألا و أحنا مجهزين شنطة الولاده ( اقتراحات لإيش احط بشنطة الولاده )

كذلك نكون عارفين ايش افضل الوضعيات لوقت الولاده و الطلق و تقنيات التنفس للاستعداد للولاده

المقصد أنه في طول وقت الطلق و الولاده نضل في وضعيه عموديه عشان الجاذبيه تسحب الطفل لتحت اكثر ، و اذا ضلينا بوضعية الركوع رح يخف ضغط الجنين على الظهر ، و يتعدل وضع الجنين اكثر ، يعني اخف ألم ، و اسرع ولاده باذن الله

و كذلك ينصحون بصعود على الدرج و النزول اكثر من المشي ، لأنه خلال المشي على الدرج الحوض بيتحرك اكثر ليدفع الجنين لداخل الحوض

 قرأت كثير من مصادر علميه ايش هي افضل الاشياء اللي تساعد على تسهيل الولاده و تليين عنق الرحم

كثير اجمعوا أنه شاي ورق التوت هو افضل شي ( الرابط عالصوره )

و فيه مصادر تنصح بشربه طول فتره الحمل ، و فيه مصادر يقولون بالثلث الاخير من الحمل افضل ، عموما أنصح فيه بقوه فوائده جباره للرحم و الحمل اقروا عنه

 

جربت هذه الحبوب اللي تستخدم اخر ٦ اسابيع من الحمل ، يعني من الاسبوع ٣٦

هي تركيبه عشبيه المفروض أنها تساعد على تليين عنق الرحم و تسهيل الولاده و تقليل الألم وقت الطلق بإذن الله ، الريفيوز على المنتج تحمس جدا ، اللي تقول أنه الطلق و الولاده كانت ٣ ساعات بس ، و اللي تقول انه كان طلقها خفيف و غير مؤلم ، وحده تقول رحت المستشفى بس بكشف لأنه كان ألم خفيف لايذكر و فجأه قالوا لي الرحم مفتوح ٧ سم و يالله ولاده 😅

 طبعاً اخترت اني اكلها على مسؤوليتي الشخصيه ، و أنا غير مسؤوله عن اي وحده تجربها و ماتناسبها ✋ استشيري طبيبتك قبل ماتستخدمين اي منتج

 

التمر افضل غذاء للحامل من اليوم الأول ، و أقوى مسهل للولاده بإذن الله ، طبعا اذا قلنا ناكل تمر مايعني حبتين ثلاث ، نقصد ناكله أكل 😄👋

ماننسا أنه اللي وصا في ربي لمريم ( و هزي إليك بجذع النخله تساقط عليك رطباً جنياً ) العلماء قالوا انه الرطب و التمر كلهم معنيين في الآيه

ماء زمزم رائع للثلث الاخير من الحمل ، اكثر ماء يحتوي على صوديوم و بوتاسيوم ينشط العقل و الجسد و فيه بركه و تسهيل للولاده باذن ربي

كذلك فيه دراسات لقت أنه تركيبة ماء زمزم جداً تشبه تركيبة السائل الأمونسي للجنين عشان كذا دايم يوصف للي موية الجنين تقل عندها

يجي بعده ماء جوز الهند نفس الفوائد مع سكريات تنشط كذلك ، ارشحها لوقت الولاده كثير و اذا بغيت اروح المستشفى باخذ لي كم قارورة ماء جوزهند تنشطني وقت الولاده و الطلق و تعطيني طاقه للدفع و غيره

و بعده يجي مياه البنابيع او الابار الجوفيه ، كلها املاحها اكثر يعني نشاط اكثر

نحتاج نهتم بجوده المياه اللي بنشربها هالشهر كثير

ذكرت لكم الأشياء اللي تسهل الولاده من نتيجة بحثي العلمي البحت

يعني : قرفه ، أناناس ، خروع ، زعفران ، يانسون ، بهارات كاري ، ماء ورد ، قرنفل ، حلبه ، حلتيت ، و غيرها من النصايح اللي يتداولها الناس ، دورت لها مصدر علمي او بحث يثبت فعاليتها لكن مالقيت ، أو الابحاث تكون ضعيفه عليها ، او تكون لها نتائج سلبيه بالرغم من فعاليتها مثل الخروع

عملوا بحث عليه في استراليا لنساء حوامل تعدا موعد ولادتهم و خلوهم يجربونه ، ٥١٪ من الحوامل جتهم الولاده بعد استخدامه ، لكن بالمقابل معروف . جاهم اسهال شديد وقتها ( و انتي مو رايقه لهالامر وقت الولاده 😅) ، السبب أنه حركة الأمعاء القويه اللي سببها الخروع صارت تضرب عالرحم لما هيجته و شغلت الطلق

بالنسبه للمكمل اللي استخدمته خلال الحمل كنت مقرره مااصرح فيه الا اذا أتممت تجربتي فيه و لقيت نتيجه حلوه منه

مكمل للحامل و لبعد الحمل من اي هيرب ، فيتامينات مستخرجه من مصادر طبيعيه من الخضار و الفواكه ، فيه بعض الاعشاب و نسبه من البروبايوتيك لتسهيل الهضم و امتصاص الفيتامينات

حبيته كثير و خفيف عالمعده و مايتعب ، انصح فيه 👍

و أكثر شي شكرت ربي عليه و اضل اشكر ربي عليه كل يوم من ايام حملي

الرياضه

من قبل الحمل كنت اسوي رياضه مقاومه ( حديد و اثقال ) ماوقفت بعد الحمل الا اول شهرين بعدين كملت لين الشهر الثامن وقفت اثقال و صرت اعمل تماريني تحت الماء ( بوزن جسمي و ثقل ارتداد الماء )

بحملي السابق كنت مااوصل الشهر السابع الا و أنا أعرج من ألم الحوض بسبب ضعف الأربطه و ضغط الجنين عليها ، الشهر الثامن خلاص اصلي و أنا جالسه بصعووووبه اقوم و اقعد ، إذا قعدت ماقمت و اذا قمت بصعوبه اجلس 😅 حالتي صعبه و ثقل عجيب كان فيني

الحمل هذا ، الحمدلله الحمدلله من فضل ربي و كرمه حملي خفيف بشكل

كل يوم امشي فيه بنشاط بدون مااعرج اشكر ربي انه دخلني بعالم الرياضه و خلاني اكمل 💕 كل مره اجلس و اقوم بدون مااتمسك بشي حولي ، لما العب مع بناتي بدون مااتعب ، لما اشيل الثقيل بدون ماينفك ظهري ، لما اعمل كل مهامي اليوميه بدون تقصير و تعب بسبب الحمل ،، ياربي لك الحمد و الشكر

الرياضه بحياتك رخ تصنع لك الفرق ، الرياضه مو عشان ننحف بس ، احنا نسوي رياضه عشان هذه الأيام بالذات ، اللي نكون فيها من جد محتاجين جسم قوي

الجانب النفسي /

هرمون الولاده أو الطلق ( الاوكسيتوسن ) هو هرمون ، مثل باقي الهرمونات ، النفسيه لها دور كبير فيه

إذا خايفه ، مذعوره ، زعلانه ، أي شعور سلبي ممكن يأثر فيه و يخليه مايشتغل صح ، عشان كذا إيش نحتاج ؟

رييييييييلاااااااااكس

صحيح أنه هذا الشهر أصعب شهر من ناحية النفسيه ، لكن أكثر شهر مهم تكونين فيه مسترخيه اكبر قدر ممكن و تكون معنوياتك مرتفعه ، سيطري على نفسيتك غصب عنها لا تسمحين لأي شي يوترك

شغلي شموع و اعملي شاي الاعشاب حقك بالليل و اقري كتاب شوفي فلم روحي الأماكن اللي تحبينها اعملي بديكير و منيكير خلي اظافرك جميله و جاهزه لبعد الولاده ، قابلي صديقاتك و الناس اللي تخليك تضحكين و ترجعين منهم طاقتك متجدده ، كافئي نفسك بأي شي تحبينه اطلعي امشي بأي مكان ممكن ، عالبحر بالحديقه بالبر بالشارع بالسوق بالحوش اي مكان

وقفي تفكير بالولاده و صعوباتها و فكري بس بهدؤك و روقانك ، كلما كانت نفسيتك ايجابيه أكثر كلما كانت ولادتك أسهل ، و كلما كنتي خايفه و متوتره اكثر كلما تصعبت عليك ، أقول هالكلام علمياً صحيح و عليه دراسات مو بس عشان التحفيز

أجسامنا مخلوقه عشان عملية الحمل و الولاده فـ مافيه شي غريب و يخوف بالولاده ، عمليه فطريه تمر فيها كل المخلوقات الحيه ، الخوف منها غير مبرر و منطقي ابدا ، خليك ايجابيه و ادعي ربي كثير انه يسهلها لك و توكلي عليه ، اذا الامر راح لربي خلاص معناته كله خير و بركه

تقبلي الألم بروح ايجابيه و اعرفي أنه كل لحظة ألم و تعب تقربك من شوفة جنينك اللي انتظرتيه كل هالوقت

---

الولاده

اممممم قعدت ربع ساعه اطالع لوحة المفاتيح و اشاور نفسي ، أقول و لا ماأقول 🙃 أوك ،، وصلت الأسبوع 41 و تعديته بكم يوم ، وضع الجنين كان تمام و راسه واصل عنق الرحم لكن مافيه طلق ، و نوره بدت تطق من الطفش 😐💔

كل يوم يمر علي مثل سنه بس قاعده طول اليوم انتظر الطلق يجي ، خصوصا اذا تأخرت الولاده يصير الوضع توتر ، بين خوف عالجنين و حاله الحمل و كل اشياءك اللي ماانجزتيها تتنظرين لبعد الولاده

المهم و بعد استشارة طبيبتي ،، شربت الخروع 🙃 ( طبعاً مو أي حاله آمن لها زيت الخروع لازم الطبيبه تتابع حالتك ) و كنت في تواصل مع طبيبتي علطول بالواتس اب ( دكتوره منال في مجمع المرجان الطبي بالدمام ) و أنا غير مسؤوله عن اي وحده بتستخدمه قلت سابقاً الرأي العلمي بخصوصه .

بعد 6 ساعات من شربه بدا الطلق يتحرك ( علمياً الخروع يعمل حركة قويه بالقولون و هي حركة الاسهال تكرمون ، فـ هذه الحركه تضرب على الرحم و تهيج الطلق ، لكن بيكون فيه خطوره انه يصير فيه طلق بدون مايفتح الرحم وقتها بيتعب الجنين ، يعني الحركه مغامره لازم تصيرين في متابعه مع الاطباء علطول إذا قررتي تستخدمينه )

بدا خفيف و بارد لكن منتظم بحدود الساعه 10 بالليل ، عمت تخطيط و فحص ، الرحم فتح 1 سم و الطلق موجود و منتظم ، قالت لي الدكتوره باذن الصباح بتكونين والده

رحت البيت خذيت شاور و لفيت شنطتي ، عملت شاي ورق التوت ( يساعد على فتح عنق الرحم و تسريع الولاده ) و مشيت للمستشفى اللي بولد فيه ( مستشفى الهيئه الملكيه بالجبيل )

كنت في المرحله الأولى من الطلق ، وقت الطلقه اخذ نفس عميييق مع التركيز على التنفس و محاوله نسيان الألم كانت استراتيجيه ناجحه

وصلت المستشفى و عملنا تخطيط للطلق و باقي التحاليل و الأوراق ، لقوا أنه فيه طلق و علطول اخذوني لغرفة الولاده و الدكتوره فتحت كيس الجنين عشان تسرع الولاده و فتح عنق الرحم ، مدة ساعتين كان الطلق بارد و محتمل ، كنت اقدر اسيطر عليه عن طريق التنفس و المشي و جلسة السكوات او الركوع ( الوضعيات المناسبه للولاده موجوده بالصوره فوق )

بعدها مدة 3 ساعات كان الطلق شديد و مؤلم جداً ، لكن مو لدرجة إني أخذ مسكن ( ماأخذت أي نوع مسكن ) المسكن اللي عن طريق الاكسجين مايسوي شي – المسكن اللي بالعضل يخليك تنامين بس ، لكن مايخفف الألم ، يعني اصير لا أنا اللي قدرت أنام و لا أنا اللي تخلصت من الألم ، فوق مشكلة الطلق تصير عندي مشكله بي نوم و مااقدر انام من الألم 😅

و الابيدورال أو ابرة الظهر لها مخاطرها المعروفه ، لكن قلت بطلبها اذا احتجت طلق صناعي لأن ألمه غير محتمل ، لكن طالما طلقي طبيعي مارح اطلبها

الحمدلله قدرت اتحمل الألم لين ماولدت ،، الشكر لربي ثم لزوجي اللي ضل جنبي طول وقت الطلق ، وجود احد تحبينه معك بيرفع معنوياتك كثير 💕 بيذكرك بالدعاء اللي بيكون مستجاب بهالوقت ، بيقول لك أنه كل هالألم بيعدي و قربت لحظة اللقاء بطفلك ، بيساعدك تشربين ماء اذا عطشتي و يعطيك التمر عشان يعطيك طاقه

المهم أنه بين الطلقات احرص على اخذ النفس العمييييق ، طبعا يوم اشتد الطلق مانفع التنفس و لا كنت اقدر اتحرك عشان اغير وضعيتي 😬💔 لكن قدر الامكان اخلي وضعي عمودي ، رفعت ظهر السرير علي اعلي حد بحيث اكون شبه جالسه ، عشان نساعد انه الجاذبيه تسحب الجنين اسرع لتحت و فتح الرحم 10 سم اخيرن ، و كم دفعه ….

و نورت صغيرتي اخيراً  💕

شفتوا كل هالصعوبات و رحلة الحمل و الولاده اللي كاتبتها فوق ؟

معجزة من ربي أنه كلللها تنسينها مجرد ماتشوفين جنينك اللي انتظرتيه كل هالوقت ، كيف بعد كل هالتعب فجأه تضحكين

هذه الرحله انتهت ، و كل هالتعب و المخاوف تبددت ماشاء الله تبارك الله

و تبدا رحله جديده مع طفلنا الجديد ، إنسان جديد انضاف للهذا العالم ، يبدا بكفاح بهذه الارض ليكمل اعمارها ، متأملين المعجزه كيف سبحانه ربي 💕

و أنتهت رحلة الحمل على خير الحمدلله

مثل ماقالت وحده من المتابعات بنتك صارت مثل بنتنا تابعنا مراحل حملها و عشناها معك 🤗 شكراً لكل من بارك لي و دعا لي و لذريتي

خليني احكيكم عن خلاصة تجاربي /

الحمل مع نظام صحي و نباتي /

الحمدلله صحتي في هذا الحمل افضل من الحمل السابق ، صحتي و صحة بنتي بعد ما ولدتها كانت ممتازه لا قوة الا بالله ، مشاكل الحمل من حموضه و صعوبة هضم و فقر دم و غيرها كانت اخف بكثييير من الحمل السابق ، ماعانيت من نقص فيتامين دال و كالسيوم مع اني ماكنت اخذ المكمل ( فقط تغذيه كويسه ) الحديد نقص شوي اخر الحمل و اخذت 3 كورسات ابرة حديد و تعدل الحمدلله لكن ماأثر بعدين بعد الولاده ، صح . بعد الولاده ، بالعاده اصير – جثه – بعد الولاده 😅 مااقدر اتحرك من سريري أول اسبوع مثل العجوز حتى اذا قمت للحمام تكرمون لازم احد يمسكني و لا اتمسك الجدار عشان امشي و يمسك معي هبوط و اغماء اذا وقفت ، الحمدلله بعد الولاده هالمره تعبت اول يوم بس بعدين رجعت طبيعيه بفضل ربي و قوته 💕

 

حبوب دكتور كريستوفر بيرث بريب /

أنا بديت فيها من الاسبوع ٣٦ ، و خلصتها بالاسبوع ٣٩ تقريباً ، بعدها باسبوعين ولدت ، فـ ماشفت النتايج العجيبه اللي يحكون عنها بالريفيوز ( ولاده قصيره مافيه الم طلق و غيره )

لكن الولاده كان وقتها اقصر من الولادات السابقه ، اول كان طلقي مايقل عن ١٢ ساعه ، هالمره حدود ٦ ساعات أو أكثر ، عنق الرحم مافتح بسرعه مثل ماقالوا بالريفيوز كذلك ، امممم و الألم كان شديد يعني ماخفف ألم الطلق كلياً ، لكن وقت الطلق الشديد كان قليل نسبياً تقريبا ٣ ساعات أو أكثر

و أنا أتوقع لأنه مر اسبوعين من يوم خلصتها ، فـ إذا بيصير فيه مفعول امداه راح خلال هالاسبوعين عشان كذا ماشفت النتيجه اللي كنت انتظرها

السؤال هنا ، هل بستخدمها مره ثانيه ؟ نعم بعطيها فرصه ثانيه بالمستقبل و بجربها مره ثانيه باذن الله

 

الرياضه وقت الحمل /

سولفت عنه قبل و برجع اتكلم عنه الحين و بعدين و بكرا و بكرا و طول عمري بضل امدح بالرياضه وقت الحمل ، هي افضل شي سويته ياربي لك الحمد 🙏

الجسم أقوى ، قدرت اشيل الحمل لين اخر يوم حمل ، امشي مسافات طويله بدون تعب ، اصعد و انزل درج بدون مااتعب ، اصلي و انا واقفه و اركع و اسجد عادي ، اشتغل كثير بالبيت بدون مايتكسر جسمي نهاية اليوم ، ايش امدح و اخلي باختصار اذا بقول السر وراء حمل خفيف و سهل هو ( الرياضه ) بعد فضل ربي

طبعاً عشان نكون بالصوره انا اعمل الرياضه من سنوات ( كارديو و اثقال ) و قبل الحمل بـ 3 شهور اشتركت مع مدربه ترتب لي جدولي الرياضي بحيث نركز على عضلات الظهر و الافخاذ ( هي اكثر عضلات تتعب بشيل الجنين ) ، و بعد ماصرت حامل كملت نفس جدولي الرياضي ، يوم صار الوحام وقفت رياضة الحديد عشاني صرت مااقدر اكمل احتياجي الغذائي فـ ماأبي اخسر عضل ، لكن استمريت على اليوجا ، بعد ماصرت اقدر اكل كملت الرياضه ، لين نهاية الثامن و التاسع صرت اعمل تماريني تحت الماء بوزن الماء و جسمي و وقفت اثقال

الولاده في مستشفى الهيئه الملكيه بالجبيل /

قبل مااقرر اني اولد بالجبيل ، درت على كل مستشفيات الخبر و الدمام ، دخلت اقسام الولاده فيها و غرف التنويم ، شفت الطاقم الطبي بقسم الولاده و شفت انظمتهم كيف ، مالقيت مستشفى أحسن من الهيئه ، من ناحية الحرص على الولاده الطبيعيه – العنايه و التعامل اللطيف وقت الولاده و الخدمه بعد الولاده – نظافة المستشفى و احترافية الطاقم الطبي

عندهم حركة الـ skin to skin contact

و كذلك يحرصون كثير عالرضاعه الطبيعيه ، و اذا صار لازم يرضع صناعي يعطونه الحليب بالكوب عشان مايتعود عالرضاعه الصناعيه و يصير يرجع يشرب طبيعي و تقابلك مرشدة رضاعه طبيعيه اذا انتي اول مره و تعلمك و تساعدك عشان ترضعين طبيعي صح

يأخرون قص الحبل السري عشان يستفيد المولود من دم المشيمه لاخر لحظه

يوفرون لك كمادات دافيه وقت الولاده كانت مره مريحه حطيتها اسفل ظهري تبرررد الطلق كثير

وجباتهم فيها خيارات نباتيه ، مثلا يحطون رز – لحم – مرق فاصوليا ، أو رز و لحم و مرق خضار ، الفطور مثلا فيه بيض و فيه فول

سلبياته : وقت الولاده يبونك بس منسدحه عشان يسمعون التخطيط ، ماكانو يبوني امشي كثير ، 5 دقايق و يقعدوني مره ثانيه – بس أنا مااسمع الكلام و اضل أمشي اكثر 🌝 –

يخلون الزوج يقعد معك بغرفة الولاده طول الوقت بس لما يجي وقت طلوع الراس و الخياطه و هالامور يخلونه يطلع ( بيني و بينكم اذا اصر الزوج يقعد بيخلونه عادي )

أكلهم مو لذيذ و خياراتهم بالرغم من انه فيه نباتي لكن مو صحي ، الخبز ابيض و الرز ابيض و حليب معلب و عصيرات معلبه و كيك و كريم كاراميل وغيره ( يعني جيبي اكلك معك و كثري سناكات اذا بتروحين لهم لأنه تجوعيييين )

ماعندهم خدمات دلع مثل المستشفيات الخاصه ، تاخذين معك الشامبو و فرشاة الاسنان و منشفتك و السلبير و اغراضك الشخصيه معك

و بس هذا اللي ببالي حاليا ، اذا عندكم اي سؤال بخصوص المستشفى رح اجاوبكم باللي اعرف

 

بالدمام لقيت مستشفى شبيه جدا جدا لنظام مستشفى الهيئه الملكيه و هو مستشفى العنايه الشامله بالدمام ، عيبة الوحيد انه مافيه مواقف و موقعه جدا سيئ ، لكن من داخل مرتب و الطاقم الطبي لطيفين و مرحبين و كذلك يشجعون عالولاده الطبيعيه و اسعارهم حلوه ، ناسيه بالضبط لكن كانت بحدود ٣٠٠٠ ريال للولاده الطبيعيه

 

 

---

 

 

 

 

في هذه التدوينه حبيتها تكون فائده و مشاركه وجدانيه لكل حامل أو من تفكر بالحمل ، جميل أنك تكونين بالصوره لكل مراحل الحمل الي بتمرين فيها ، بشوفين العجب في الحمل و بتتطمنين أنه كل اللي تمرين فيه من صعوبات طبيعيه و كل الحوامل يمرون فيها ، أعرف وش قد الحوامل – البكريات و غيرهم – يصيرون ضايعات ، اي عرض يمرون فيه يتوترون منه ، دايم خايفين على صحتهم و صحة جنينهم ، و بيرتاحون اكثر اذا لقوا احد يشاركهم هالشيء

أتمنى اكون افدتكم بالقدر اللي يساعدكم تمرون بحملكم بصحه و ايجابيه ، و يارب يكتب لكم كل الخير 💞

 

 

دعواتكم لي و لذريتي بالخير و التوفيق و التسخير

أتمنى لكم حياة سعيده و كلها ايجابيه يارب 💕