السلام

الطبق هذا نقدر نقول ” طبق إدماني ” من لذته بارك الله

كل يوم اقاوم نفسي عشان مااسويه كل 5 دقايق من جد اعجبني من قلب

و مكوناته مبسطه و سهله و علاجيه

علاجيه ؟

لأني اضفت فاصوليا الازوكي الخارقه , جدا مفيده للكلى ، و معنى كلمة ادزوكي اصلا ” شافي الكلى ” و الشافي ربي

و مليانه بروتين و أنزيمات كامله تغني عن اللحوم

موجوده عن السوبرماركتات اللي تبيع مستورد و موجوده عند اي هيرب ( إذا ضغطتوا عالصوره يفتح لكم رابط اي هيرب )

Bob's Red Mill, Adzuki Heritage Beans, 28 oz (793 g)

ماهو مكون اساسي عشان يكون البرجر لذيذ ، لكن لزيادة القيمه الغذائيه اذا توفر هذه طريقه له ?

حتى للناس اللي مش نباتيين ، مايمنع تجربونها للتغيير ، أقولكم اللي مايجربها بيفوته الكثيييير

بالواقع جربت كثير طرق للبرجرات النباتيه تطلع لذيذه لكن مو نفس طعم اللحم ، نفس الفلافل اذا صار مع حمص ، نفس الكباب اذا صار معه كثير بهارات و بصل و ثوم و كزبره و بقدونس

هذا البرجر طعمه بشبه اللحم بشكل يصصصصدم ماشاء الله ?❤❤

أنا اسوي منه كميه و اسويها اقراص واحطها بالفريزر ، يصير اذا بغيت اخذ قرص و احمره بفرن شوي و يكون جاهز

البطاطس اللي سويته معه طريقته هنا بطاطس بالفرن طبق كل يوم

و الكميات حسب ذوقكم و الكميه اللي حابين تسوونها و اللي متوفر مافيه قواعد

المقادير /

  • ٢ ك فاصوليا متنوعه ( اللي متوفر من : فاصوليا حمراء ، سوداء ، بيضاء ، ازوكي )
  • بصله مفروم
  • ١/٢ ك فطر طازج < و هو السر باللذه
  • ١/٤ ك كزبره طازجه
  • بهاراتكم اللي حابين
  • ربع ك رز مصري مطبوخ
  • ٤ م ك شوفان مطحون أو اي نوع طحين ( الكميه ممكن تزيد حسب الحاجه )

الطريقه /

  1. تطبخ الفاصوليا اذا كانت ناشفه ، أو تنقع بماء و ملح اذا كانت معلبه للتخلص من اثر المواد الحافظه
  2. نشوح البصل بشوية زيت زيتون ثم تضاف البهارات و الفطر لمدة 5 دقائق أو حتى يذبل المزيج ثم تضاف الكزبره و نطفي النار
  3. بمحضرة الطعام نضيف خليط الفاصوليا و مزيج البصل و الفطر و الرز و الطحينو  نخلط
  4. يشكل على اقراص و يوضع بالفريزر حتى يجمد
  5. وقت الطبخ يرش عليه طحين ثم يشرح بالمقلاه مع قليل زيت او بمقلاة غير قابله للالتصاق بدون زيت مدة دقيقه لكل وجه ، فقط للتحمير

ملاحظات بخصوص الطبق :

المزيج طبيعي مايكون متماسك مثل اللحمه ، بيكون قوامه تقريبا قريب لقوام الكفته عادي هو كذا

و ضروري تحطونه بالفزيرز عشان يتماسك اكثر بعدين تشوحونه عالنار عشان مايتفكك

 

بالعافيه ، بشروني بالنتايج اذا سويتوه ?